काठमाडौँ ।काठमाडौँको तीनकुनेमा आयोजित राजावादीहरूको आन्दोलनको कमाण्डर रहेका दुर्गा प्रसाईँ यति बेला प्रहरीको खोजीमा छन् ।
प्रसाईँले काठमाडौँमा चरम अराजकता प्रदर्शनसँगै पछिल्लो दुई दिनदेखि फरार छन् । उनलाई खोज्न प्रहरीको विशेष टीम नै परिचालन गरिएको छ । यही बिचमा प्रसाईँले आफू नभागेको सन्देश प्रवाह गरेका छन् ।
प्रसाईले एक भिडियो सन्देश जारी गर्दै आफ्नो ज्यान जोगाउन काठमाडौँकै कुनै एक मन्दिरमा सुरक्षित भएर बसेको भन्दै आफू देश छोडेर नभागेको जनाएका छन् ।
‘म सुरक्षाकर्मीहरूलाई भन्न चाहन्छु, म तपाईँहरूभन्दा टाढा छैन। म भागेको छैन । पुलिस प्रशासनले मलाई खोज्न पर्दैन। मलाई भेटेको ठाउँमा गोली हान्ने आदेश भएकाले म सुरक्षित मात्र भएर जन्मेको हुँ । म भाग्नलाई जन्मेको होइन ।’ उनले भनेका छन् ।
चैत १५ गतेको कार्यक्रम आफूहरूले शान्तिपूर्ण तरिकाले गर्न जाँदा आफूलाई मार्ने ठुलो योजना रहेको दाबी गरेका छन् । उनले भने, ‘लघुवित्त पीडित, सहकारी पीडित, बैंक पीडित, विदेश जाने पीडितलगायतको आवाजलाई उठाएर अघि बढाएपछि अब हामीले लडाइँ जित्छौँ, विद्रोह सफल हुन्छ भनेपछि विभिन्न भेसभुसामा युवा संघ र पुलिस प्रशासनका केही व्यक्ति सिभिल ड्रेसमा अर्काको घरमा चढेर घटना घटाइयो ।’
उनले आफूहरू कार्यक्रम स्थल पुग्नुभन्दा अघि नै स्टेजमा बाटोबाटै गोली र टियर ग्यास हान्न थालेको दाबी गरेका छन्। आफ्नै गाडीमा टियर ग्यास हानेपछि कि त यिनीहरूले मलाई पेरुको गोन्जालोजस्तो थुन्नुपर्यो कि त मार्ने षडयन्त्र गरेको हो भन्ने थाहा पाएपछि पुलिसको ब्यारिकेड तोडेर सुरक्षित स्थानमा मात्र पुगेको उनको जिकिर छ ।
सरकारले तिनकुनेमा राजावादीलाई आन्दोलन गर्ने स्थान दिएको थियो। प्रसाईँले निषेधाज्ञा तोड्ने भन्दै आफ्नो गाडी प्रहरि तर्फ जबरजस्ती लगेका थिए । उनले गाडी भित्रैबाट भिडियो खिच्न लगाएका थिए ।
