काठमाडौँ । बैंक तथा वित्तीय संस्थामा अधिक तरलता भएको कारण कर्जा विस्तार हुन नसकेको भन्दै नेपाल राष्ट्र बैंकले आज बैंक तथा वित्तीय संस्थाबाट ५० अर्ब तरलता खिच्ने भएको छ।
बैंकले १४ दिने निक्षेप संकलन उपकरण मार्फत फागुन २४ देखि चैत ८ गतेसम्मका लागि ५० अर्ब निक्षेप संकलन गर्न लागेको एक सूचना मार्फत जानकारी गराएको छ । राष्ट्र बैकबाट इजाजत पाएका क, ख र ग वर्गका बैंक तथा वित्तीय संस्थाले निक्षेप संकलनको बोलकबोलका लागि आवेदन दिन सक्नेछन्।
ती संस्थाले कम्तिमा १० करोड देखि सो भन्दा माथि ५ करोडले भाग गर्दा निःशेष भाग जाने रकम ५० अर्बसम्मै बोल गर्न सक्नेछन् ।
ब्याजको हकमा सबैभन्दा कम कबोल गरिएको ब्याजलाई पहिलो प्राथमिकतामा राखी सोही क्रमले बोल गरिएको रकम क्रमशः बाँडफाँड हुनेछ । यसरी निक्षेप संकलन गरिएको रकम तरलता अनुपात तथा एसएलआरमा बैंक तथा वित्तीय संस्थाले गणना गर्न पाउने भएका छन् ।
