काठमाडौँ । शेयर बजार मापक नेप्से परिसूचक आज पनि दोहोरो अंकले घटेको छ । हिजो बुधबार ४७.९३ अंकले घटेको परिसूचक आज ३१.५० अंकले घटेर २९२२.६३ बिन्दुमा ओर्लिएको हो ।
आज सेन्सेटिभ इण्डेक्स ६.७१ अंक घट्यो भने फ्लोट इण्डेक्स र सेन्सेटिभ फ्लोट इण्डेक्स क्रमशः २.०७ र २.३६ अंकले घटे ।
नेप्से परिसूचकसँगै आज कारोबार रकम पनि घटेको छ। हिजो १६ अर्ब ४४ करोड रुपैयाँ बराबरको शेयर खरिदबिक्री भएकोमा आज १५ अर्ब ९८ करोड ८९ लाख रुपैयाँको मात्रै शेयर खरिदबिक्री भए । नेपाल स्टक एक्स्चेन्जले जनाएअनुसार आज ३ करोड ६८ लाख ७१ हजार कित्ता शेयर खरिदबिक्री भएको हो ।
आज हिमालयन रिइन्स्योरेन्स कम्पनी लिमिटेडले सर्वाधिक १ अर्ब ३३ करोड ८८ लाख १६ हजार ७७० रुपैयाँ बराबरको कारोबार गरेको छ । आज हिमालयन रिइन्स्योरेन्सका ११ लाख ९५ हजार ६२३ कित्ता शेयर किनबेच भएका हुन् ।
आज ५२ वटा कम्पनीको मूल्य बढ्दा १९८ कम्पनीको मूल्य घट्न पुगेको हो ।
आज वित्त उपसमूहबाहेक अरू सबै उपसमूहको परिसूचक घटेको छ।
