काठमाडौं । चालु आर्थिक वर्ष २०८१र८२ को दुई महिनामै शोधनान्तर बचत १ खर्ब नाघेको छ । नेपाल राष्ट्र बैंकले आज प्रकाशित गरेको चालु आवको साउन र भदौको तथ्यांकका आधारमा मुलुकको आर्थिक तथा वित्तीय अवस्थाको प्रतिवेदन सार्वजनिक गरेको हो ।
राष्ट्र बैंकले प्रकाशित गरेको तथ्यांक अनुसार भदौ मसान्तमा भुक्तानी शोधनान्तर स्थिति १ खर्ब १ अर्ब ७७ करोडले बचतमा छ ।
गत आव २०८०/८१ को सोही अवधिमा भुक्तानी सन्तुलन ५५ अर्ब १० करोडले बचतमा थियो ।
यस्तै भदौसम्म चालु खाता बचत ४९ अर्ब ६९ करोड पुगेको राष्ट्र बैंकले जनाएको छ । गत आव यही अवधिमा २३ अर्ब ९७ करोडले बचतमा रहेको चालु खातामा थप सुधार देखिएको छ ।
खुद पुँजीगत ट्रान्सफर १ अर्ब २० करोड कायम भएको र प्रत्यक्ष वैदेशिक लगानी आप्रवाह २ अर्ब ७१ करोड रहेको राष्ट्र बैंकले जानकारी दिएको छ । अघिल्लो वर्ष सोही अवधिमा खुद पूँजीगत ट्रान्सफर ८५ करोड ८ लाख र प्रत्यक्ष वैदेशिक लगानी आप्रवाह ३ अर्ब थियो ।
