काठमाडौँ । अमेरिका र इरानबीच अप्रिलदेखि लागू भनिएको युद्धविराम व्यवहारमा कमजोर बन्दै गएको संकेत देखिएको छ। हर्मुज जलमार्ग आसपास अमेरिकी सैन्य गतिविधि बढेपछि मध्यपूर्वमा तनाव पुनः चर्किएको हो।
अमेरिकी पक्षका अनुसार उनीहरूले इरानसँग सम्बन्धित चार आक्रमणकारी ड्रोन निष्क्रिय बनाउनुका साथै बन्दर अब्बास क्षेत्रमा रहेको एक ड्रोन नियन्त्रण केन्द्रलाई निशाना बनाएका छन्। उक्त केन्द्रबाट थप ड्रोन सञ्चालन गर्ने तयारी भइरहेको आशंकामा कारबाही गरिएको दाबी गरिएको छ।
यता इरानले भने यो कदमलाई युद्धविरामको उल्लंघन भन्दै आपत्ति जनाएको छ। इरानी सञ्चारमाध्यमले इस्लामिक रिभोलुसनरी गार्ड्सले अमेरिकी सम्बन्धित तेल ट्यांकरलाई चेतावनी दिँदै फर्काएको दाबी गरेका छन्। त्यसपछि अमेरिकी सेनाले बन्दर अब्बास आसपासका क्षेत्रमा आक्रमण गरेको इरानी दाबी छ।
हर्मुज जलमार्ग विश्व ऊर्जा आपूर्तिको प्रमुख मार्गमध्ये एक मानिन्छ। यस मार्गबाट विश्वको ठूलो हिस्सा तेल तथा ग्यास ढुवानी हुने गरेकामा हाल जहाज आवागमनमा उल्लेख्य गिरावट आएको जनाइएको छ।
यसैबीच डोनाल्ड ट्रम्प ले हर्मुज जलमार्ग कुनै एक देशको नियन्त्रणमा जान नदिने स्पष्ट पारेका छन्। इरान र ओमान बीच संयुक्त व्यवस्थापनको सम्भावनाबारे चर्चा भइरहेका बेला ट्रम्पले त्यसप्रति असहमति जनाएका हुन्।
