काठमाडौं । मारूती सिमेन्ट उद्योगका सञ्चालक नन्दकिशोर राठीसहित ८ जनाविरूद्ध पक्राउ पुर्जी जारी भएको छ । कमसल सिमेन्ट बेचेको कसुरमा उनिहरूविरूद्ध पक्राउ पुर्जी जारी भएको हाे ।
ठगीसम्बन्धी कसुरमा राठीसहित उनका छोरालगायतलाई पक्राउ गर्न जिल्ला प्रहरी कार्यालय सप्तरीले पक्राउ अनुमति लिएको हो । उनिहरूलाई कमसल सिमेन्ट बेचेर ठगी गरेको आरोप छ ।
पक्राउ पुर्जी जारी हुनेमा मारूती सिमेन्टका प्रमुख सञ्चालक नन्दकिशोर, प्रबन्ध निर्देशक उनका छोरा अनुज, उद्योगका प्रतिनिधि लक्ष्मीप्रसाद सिवाकोटी, डिलर सञ्जय साह, सिमेन्ट बिक्री गर्ने नरेश साह, अजयकुमार साह छन् । बिजनेस डाइरेक्टर ज्योति शर्मा भने पक्राउ परेका छन् । उनीहरूविरूद्ध असार ११ गते नै पुर्जी जारी भएको हो ।
प्रहरी उपरीक्षक (एसपी) नरेन्द्रकुमार कार्कीका अनुसार राजविराज नगरपालिका घर भएका पत्रकार दिवाकर साहले घर बनाउँदा मारूती सिमेन्ट प्रयोग गरेको तर ढलान नै भत्किएको भन्दै उनीहरूविरूद्ध प्रहरीमा जाहेरी दिएका हुन् ।
