काठमाडौँ । बिहानैदेखि निरन्तर रूपमा परेको अविरल वर्षासँगै आएको पहिरोको कारण नौबिसे–काठमाडौँ सडक सहित देशभरमा २५ बढी स्थानको सडक अवरुद्ध भएको छ।
नौबिसे सुरुङमार्ग नजिकै लेदोसहित पहिरो खसेपछि सडक दुईतर्फी नै अवरुद्ध भएको हो। पानी निरन्तर परिरहेकाले पहिरो पन्छाउन सकिने अवस्था नरहेको र पानी सहित पहिरो निरन्तर रूपमा बगेको कारण समस्या थपिएको प्रहरीले जनाएको छ ।
काठमाडौँ बाहिरिने र काठमाडौँ प्रवेश गर्ने उक्त नाकामा बाटो बन्द हुँदा सवारी साधन र तिनमा सवार यात्रु अलपत्र परेका छन् ।
नेपालमा मनसुनी वायु कायमै रहेका बेला बंगालको खाडीबाट जलवाष्पयुक्त वायु नेपाल प्रवेश गरेपछि त्यसैको प्रभावले काठमाडौँ उपत्यकासहित देशका अधिकांश स्थानमा वर्षा भइरहेको छ।
अत्यधिक वर्षाले पहिरो झरेर क्षति पुग्न सक्ने भएकाले असोज ११–१२ गते दुई दिन हिमाली र पहाडी जिल्लामा रात्रि बस नचलाउन सरकारले अनुरोध गरेको छ ।
