काठमाडौँ । मध्यपूर्वमा चुलिँदै गएको भू–राजनीतिक तनावले अन्तर्राष्ट्रिय बजारमा कच्चा तेलको मूल्यमा उल्लेखनीय उछाल आएको छ। अमेरिका, इजरायल र इरानबीचको विवाद समाधानतर्फ ठोस प्रगति नदेखिँदा ऊर्जा आपूर्तिको सुरक्षाप्रति विश्वव्यापी चिन्ता बढेको हो।
अन्तर्राष्ट्रिय बजारमा सोमबार ब्रेन्ट क्रुडको मूल्य १.८४ प्रतिशतले बढेर प्रति ब्यारेल १११ डलर पुगेको छ, जुन पछिल्ला महिनाहरूको उच्च स्तर मानिएको छ।
विश्लेषकहरूका अनुसार इरानसँगको तनाव अझ लम्बिए खाडी क्षेत्रमा तेल उत्पादन र ढुवानीमा अवरोध आउन सक्ने जोखिम छ। विशेषगरी स्ट्रेट अफ हर्मुज क्षेत्रमा हुने असुरक्षाले विश्व ऊर्जा बजारलाई थप अस्थिर बनाउने सम्भावना रहेको छ।
यसबीच युएईको बराकाह आणविक केन्द्रमा ड्रोन आक्रमणको खबर र साउदी अरबले आफ्ना आकाशमा घुसेका ड्रोनहरू अवरोध गरेको घटनाले क्षेत्रीय सुरक्षा अवस्था झनै संवेदनशील बनेको छ।
अमेरिकी राष्ट्रपति डोनाल्ड ट्रम्पले इरानबारे सम्भावित सैन्य विकल्पमा छलफल गर्ने तयारी गरेको खबर सार्वजनिक भएपछि लगानीकर्ताहरू थप सतर्क बनेका छन्।
ऊर्जा बजारका जानकारहरूले तेलको मूल्यमा निरन्तर वृद्धि भएमा विश्वव्यापी मुद्रास्फीति बढ्ने, ब्याजदर उच्च रहन दबाब पर्ने र आर्थिक वृद्धिमा नकारात्मक असर पर्ने चेतावनी दिएका छन्।
त्यसैगरी, अमेरिकाले केही देशलाई दिँदै आएको रूसी समुद्री तेल खरिदसम्बन्धी छुट अन्त्य गरेपछि विश्व बजारमा आपूर्ति झनै कडा हुन सक्ने अनुमान गरिएको छ।
