काठमाडौँ । सानिमा मिडिल तमोर हाईड्रोपावर लिमिटेडले चालु आर्थिक वर्षको तेस्रो त्रैमाससम्म आइपुग्दा प्रतिसेयर आम्दानी (EPS) मा सुधार गरेको छ। समीक्षा अवधिसम्म कम्पनीको EPS ७.५३ रुपैयाँ पुगेको छ, जुन अघिल्लो वर्षको सोही अवधिको ६.३४ रुपैयाँभन्दा माथि हो।
कम्पनीको खुद नाफा वृद्धि भएकै कारण EPS मा पनि सुधार देखिएको हो। चालु आवको तेस्रो त्रैमाससम्म कम्पनीले २५ करोड १० लाख रुपैयाँ खुद नाफा कमाएको छ, जुन अघिल्लो वर्षको २१ करोड ३६ लाख रुपैयाँको तुलनामा करिब १७.५० प्रतिशतले बढी हो।
यद्यपि, कम्पनीको आम्दानी पक्ष भने केही कमजोर देखिएको छ। यस अवधिमा खुद आम्दानी ५.८८ प्रतिशतले घट्दै १ अर्ब १३ करोड रुपैयाँमा झरेको छ, जुन अघिल्लो वर्ष १ अर्ब २० करोड रुपैयाँ थियो। साथै, सञ्चालन मुनाफा पनि ८२ करोड ७५ लाख रुपैयाँबाट घटेर ७४ करोड ४२ लाख रुपैयाँमा सीमित भएको छ।
तर, कम्पनीको संचित नाफा (retained earnings) मा भने उल्लेखनीय वृद्धि भएको छ। अघिल्लो वर्ष १३ करोड ८४ लाख रुपैयाँ रहेको यस्तो रकम बढेर ५८ करोड ४५ लाख रुपैयाँ पुगेको छ।
अन्य वित्तीय सूचकतर्फ हेर्दा, समीक्षा अवधिसम्म कम्पनीको प्रतिसेयर नेटवर्थ ११७.६७ रुपैयाँ र मूल्य आम्दानी अनुपात (P/E ratio) ६०.२७ गुणा कायम भएको छ।
