काठमाडौं। नाडा अटोमोबाइल्स एसोसिएशन अफ नेपालका अध्यक्ष करण कुमार चौधरीको कार्यकाल समाप्त भएको छ। चौधरीले आफ्नो कार्यकालको समाप्तिपछि सञ्चार माध्यमहरूप्रति कृतज्ञता व्यक्त गरेका छन्। उनले स्वतन्त्र, उत्तरदायी र व्यावसायिक सञ्चार माध्यमले राष्ट्रिय जीवनमा खेलेको भूमिकाको उच्च मूल्याङ्कन गर्दै आभार प्रकट गरेका हुन्।
चौधरीले भने, 'सञ्चार माध्यमले केवल सूचना प्रवाह गर्ने मात्रै नभई नीति निर्माण, अर्थतन्त्र र उद्योग–व्यवसायसम्बन्धी विभिन्न विषयमा जनचेतना अभिवृद्धि गर्ने महत्वपूर्ण दायित्व निर्वाह गर्दै आएका छन्।
कार्यकालभरि नाडाले अघि सारेका कार्यक्रम, सुधार पहल र संस्थागत रूपान्तरणका प्रयासहरूलाई सञ्चार माध्यममार्फत व्यापक जनमानस र सरोकारवाला निकायसम्म पुर्याउन सहयोग पुगेको उल्लेख गर्दै अध्यक्ष चौधरीले व्यावसायिकता, निष्पक्षता र गम्भीरताको लागि विशेष धन्यवाद दिए।
