काठमाडौँ। चालु आर्थिक वर्षको सात महिनामा वीरगन्ज नाकाबाट विद्युतीय र इन्धनबाट चल्ने सवारीसाधन आयातमा उल्लेख्य वृद्धि देखिएको छ। यस अवधिमा ४९७ वटा विद्युतीय जिप, कार र भ्यान आयात भएका छन्। जसको कुल मूल्य रु १ अर्ब ४८ करोड ६४ लाख छ। यी सवारीसाधनबाट कार्यालयले रु ९६ करोड ३६ लाख राजस्व सङ्कलन गरेको छ।
गत आर्थिक वर्षको सोही सात महिनामा भने १६५ वटा विद्युतीय जिप, कार र भ्यान आयात भएको थियो, जसको मूल्य रु ४३ करोड १ लाख र राजस्व रु ३५ करोड ५० लाख मात्र थियो।
वीरगन्ज भन्सार कार्यालयका सूचना अधिकारी उदयसिंह विष्टका अनुसार गत आवको सात महिनाको तुलनामा विद्युतीय सवारीसाधनको आयात ह्वात्तै बढेको छ । चालु आवको सात महिनामा रु ८० करोड ५७ लाखका मूल्यका हजार एक सय २८ वटा विद्युतीय मोटरसाइकल आयात भएको छ । गत आवको सोही अवधिमा भने रु ४४ करोड तीन लाख मूल्यका तीन हजार ३७४ वटा विद्युतीय मोटरसाइकल आयात भएको थियो ।
चालु आवको सात महिनामा रु एक अर्ब १६ करोड १३ लाखका छ सय नौ वटा इन्धनबाट चल्ने जिप, कार र भ्यान आयात भएको छ । ती सवारीसाधनको आयातबाट कार्यालयले रु दुई अर्ब ८६ करोड राजस्व सङ्कलन गरेको छ । गत आवको सात महिनामा भने रु एक अर्ब ५० करोड मूल्यका सात सय ४८ वटा इन्धनबाट चल्ने जिप, कार र भ्यान आयात भएको थियो । सो आवमा इन्धनबाट चल्ने सवारीसाधन आयातबाट रु तीन अर्ब ७३ करोड राजस्व सङ्कलन भएको थियो ।
कुल तथ्यांक हेर्दा चालु आर्थिक वर्षको सात महिनामा वीरगन्ज नाकाबाट रु २३ अर्ब ५७ करोड मूल्यका सवारीसाधन र पार्टपुर्जा आयात भएका छन्। गत वर्षको सोही अवधिमा भने रु १७ अर्ब १५ करोड मूल्यका सवारीसाधन आयात हुँदा रु १३ अर्ब २६ करोड राजस्व सङ्कलन भएको थियो।
