काठमाडौँ । बाढीपहिरोका कारण बैंकिङ कारोबारका लागि आवश्यक चेक, कार्ड, मोबाइल तथा अन्य कागजात गुमाएका ग्राहकले पनि बैंकिङ सेवा लिन पाउने भएका छन् ।
नेपाल राष्ट्र बैंकले बैंक तथा वित्तीय संस्थालाई परिपत्र जारी गर्दै प्राकृतिक विपत्तिबाट प्रभावित ग्राहकलाई आवश्यक बैंकिङ सेवा उपलब्ध गराउन निर्देशन दिएको हो ।
राष्ट्र बैंकका अनुसार ग्राहकले बैंकमा यसअघि उपलब्ध गराएको हस्ताक्षर नमुना, फोटो तथा अन्य विवरणका आधारमा ग्राहक पहिचान गरी वित्तीय सेवामा पहुँच सुनिश्चित गर्नुपर्नेछ ।
हालै रसुवालगायतका जिल्लामा आएको प्राकृतिक विपत्तिका कारण बैंकिङ कारोबारका लागि आवश्यक कागजात तथा सामग्री गुमाएका ग्राहकलाई यस्तो सुविधा दिन राष्ट्र बैंकले निर्देशन दिएको हो ।
ग्राहकको पहिचान बैंक तथा वित्तीय संस्थासँग रहेको ग्राहकसम्बन्धी विवरणसँग भिडाएर पुष्टि गर्नुपर्नेछ । पहिचान सुनिश्चित भएपछि आवश्यक बैंकिङ तथा वित्तीय सेवा उपलब्ध गराउन बैंकहरूलाई भनिएको छ ।
त्यस्तै, प्रभावित ग्राहकलाई आवश्यक सहयोग तथा सेवा लिन सहजीकरण गर्ने व्यवस्था मिलाउनसमेत राष्ट्र बैंकले बैंक तथा वित्तीय संस्थालाई निर्देशन दिएको छ ।
