काठमाडौँ । साताको दोस्रो कारोबारका दिन शेयर बजारमा गिरावट आएको छ । लगातार रूपमा बजारमा गिरावट आउँदा लगानीकर्ताको आत्मबलमा गिरावट आएको छ ।
नेप्से सूचकले २६ सयको मनोवैज्ञानिक स्तर तोडेर २५ सयको स्तरमा झर्दा धेरै लगानीकर्तामा थप निराशा चुलिएको छ । बजारमा लगातारको उतार–चढावका कारण दैनिक कारोबार रकम पनि औसतमा कम देखिएको छ ।
शेयर बजारको हालको परिस्थितिले जोखिमप्रति सचेत रहन र दीर्घकालीन दृष्टिकोणका साथ रणनीतिक लगानी गर्न लगानीकर्ताहरूलाई सन्देश दिएको छ। आज नेपाल स्टक एक्सचेञ्ज (नेप्से) ३३.०८ अकंले घटेर २५७६.५० बिन्दुमा आइपुगेको छ।
उक्त दिन ३०८ कम्पनीको १ करोड ३१ लाख ७४ हजार कित्ता शेयर किनबेच हुँदा ५ अर्ब ६७ करोड ४६ लाख रुपैयाँको शेयर कारोबार भएको छ।
आज विकास बैंक र फाइनान्स कम्पनीको शेयर मूल्यमा सर्वाधिक गिरावट देखिएको छ। विकास बैंक समूहको २.७७ प्रतिशत र फाइनान्स समूहको ५.१९ प्रतिशतले शेयर मूल्य घटेको छ ।
आज प्रभु बैंकको सबैभन्दा बढी कारोबार भएको छ । बैंकको ३५ करोड ९४ लाख रुपैयाँको शेयर खरिद–बिक्री भएको छ।त्यस्तै, नेपाल फाइनान्सको १७ करोड ७ लाख रुपैयाँ, जानकी फाइनान्सको १४ करोड ४२ लाख रुपैयाँ कारोबार भएको हो।
