काठमाडौँ । नेपालगन्जमा भन्सार छलीको करिब ३ लाख रुपैयाँ बराबरको सामान बरामद गरिएको छ।
जिल्ला प्रहरी कार्यालय बाँकेले नेपालगन्जमा भन्सार छली गरेर ल्याइरहेको उक्त सामान बरामद गरेको हो। भारतबाट नेपालमा भन्सार छलेर ल्याइएको सामान नेपालगन्ज ४ बसपार्कस्थित गोविन्द महतको घर अगाडी बरामद गरिएको थियो।
बरामद गरिएको सामानमा २५ किलोको चामल ८५ बोरा , २५ किलोको चिनी ९१ बोरा, चकलेट ५ बोरा, डिजिटल तराजु १ थान, बोरा सिलाउने मेसिन १ थान रहेको छ।
प्रहरीका अनुसार बरामद गरिएका सामान करिब २ लाख ९२ हजार २५० रुपैयाँको हाराहारीमा रहेको छ । उक्त सामान थप कारबाहीका लागि भन्सार कार्यालय नेपालगन्जमा पठाइएको छ ।
