काठमाडौँ । गत साता २४८६.७६ विन्दुमा बन्द भएको नेप्से, यस साता ४.४५ प्रतिशत अर्थात् ११०.७३ अंक बढेर २५९७.४९ विन्दुमा पुगेको छ।
साताभरमा भएको चार कारोबारका दिन दुई कारोबार दिन नेप्से बढेको थियो भने दुई कारोबार दिन नेप्से घटेको थियो। यस साता सोमबार र मङ्गलवार नेप्से बढेको थियो भने आइतबार र बुधवार नेप्से घटेको थियो।
यस साता सेन्सेटिभ इण्डेक्स ४.३० प्रतिशत बढेको छ भने फ्लोट इण्डेक्स ४.४१ प्रतिशत र सेन्सेटिभ फ्लोट इण्डेक्स ४.७२ प्रतिशत बढेको छ। नेप्सेसँगै यस साता दैनिक औषत कारोबार रकम पनि बढेको छ। गत साता दैनिक औषतमा ५ अर्ब २२ करोडको शेयर खरिदबिक्री भएको बजारमा यस साता दैनिक औषतमा ५ अर्ब ५४ करोडको शेयर कारोबार भएको छ।
यस साता दैनिक औषत शेयर सङ्ख्या भने २.६५ प्रतिशत र दैनिक औषत कारोबार सङ्ख्या ०.२० प्रतिशत घटेको छ। यस साता नेप्सेको कुल बजार पुँजीकरण पनि साढे ४ प्रतिशत बढेको छ। गत साताको अन्तिम कारोबार दिन ३९ खर्ब ५४ अर्ब रुपैयाँ रहेको कुल बजार पुँजीकरण यस साता १ खर्ब ७६ अर्ब रुपैयाँ बढेर ४१ खर्ब ३० अर्ब रुपैयाँ पुगेको छ।
१३ उपसमूहमध्ये यस साता १२ उपसमूहको परिसूचक बढेको छ भने एक उपसमूहको परिसूचक घटेको छ। यस साता वित्त उपसमूहको परिसूचक सर्वाधिक १४.१३ प्रतिशत बढेको छ। गत साता २७६५.२४ विन्दुमा रहेको वित्त उपसमूहको परिसूचक, यस साता ३९०.७६ अंक बढेर ३१५६.०० विन्दुमा पुगेको छ।
