काठमाडौं । वाणिज्य, आपूर्ति तथा उपभोक्ता संरक्षण विभागले आज पनि तरकारी केन्द्रित अनुगमन गरेको छ । प्याजलगायतका तरकारीको मूल्यमा अस्वाभाविक वृद्धि गरिएपछि विभागले अनुगमन बढाएको हो ।
बिहीबार २१ वटा फर्मको अनुगमन गरेको विभागको टोली आज पनि तरकारीका १२ पसलमा पुगेको छ । विभागले तीनवटा तरकारी पसललाई ७० हजार रुपैयाँ जरिवाना गरेको छ ।
मूल्यसूची तथा दर्ता प्रमाणपत्र नराखेको बालाजुको एउटा तरकारी पसललाई विभागले ५० हजार जरिवाना गराएको छ । त्यस्तै खरिद बिलविजक नराखेका कालिमाटीका २ वटा तरकारी पसललाई १० हजारका दरले जरिवाना तिराइएको छ ।
विभागले नियमविपरीत कारोबार गर्ने कालिमाटीको एउटा खाद्यवस्तु विक्रेताको पसलमा शिल गरेको छ । त्यस्तै बिलविजक नराख्ने कालिमाटीको एउटा खाद्यवस्तु विक्रेतालाई २० हजार जरिवाना गराएको छ ।
