काठमाडौं । तराई–मधेस क्षेत्रमा चर्को गर्मीका बीच विद्युत् आपूर्तिमा देखिएको समस्याप्रति जन अधिकार पार्टीले गम्भीर ध्यानाकर्षण गराएको छ ।
पार्टीका अध्यक्ष डा. शरद सिंह यादवले Nepal Electricity Authority का महाप्रबन्धकलाई ज्ञापनपत्र बुझाउँदै तराई–मधेसका जिल्लाहरूमा अनियमित विद्युत् आपूर्तिका कारण जनजीवन अत्यन्तै प्रभावित भएको बताएका छन् ।
हाल ४२ डिग्री सेल्सियसभन्दा बढी तापक्रम रहेका क्षेत्रमा समेत नियमित विद्युत् आपूर्ति नहुँदा बालबालिका, वृद्धवृद्धा र बिरामीहरू सबैभन्दा बढी प्रभावित भएको ज्ञापनपत्रमा उल्लेख छ ।
ज्ञापनपत्रमा प्राधिकरणका कर्मचारीहरूको सेवा प्रवाहप्रति पनि असन्तुष्टि जनाइएको छ । विद्युत् बिना दैनिक जीवन अत्यन्त कठिन बनेको अवस्थामा सरकारले विद्युत् उपभोग बढाउने नीति लिएको तर आपूर्ति सहज नभएको विषयलाई विरोधाभासपूर्ण भएको पार्टीको भनाइ छ ।
पार्टीले विद्युत् आपूर्तिमा देखिएको समस्या र सम्भावित जनधन क्षतिलाई विपद् सरह मान्दै राहत तथा क्षतिपूर्ति व्यवस्था गर्न सरकारसँग माग गरेको छ ।
अध्यक्ष डा. यादवले तराई–मधेसमा तत्काल प्रभावकारी विद्युत् व्यवस्थापन गर्न सरकार र सम्बन्धित निकायलाई आग्रह गरेका छन् ।
