काठमाडौं । हाथवे इन्भेष्टमेन्ट नेपालले वैदेशिक रोजगारीमा रहेका नेपालीका लागि विक्री गरेको आइपीओ भोलि साउन २५ गते बाँडफाँड गर्ने मिति तय गरेको छ । धितोपत्र बिक्री प्रबन्धक ग्लोबल आइएमई क्यापिटलको काठमाडौं नक्सालस्थित कार्यालयमा बिहान ९ बजे आइपीओ बाँडफाँड गर्ने भएको हाे ।
कम्पनीले गत साउन ४ गतेदेखि साउन १८ गतेसम्म विदेशमा रहेका नेपाली श्रमिकहरुका लागि आइपीओ बिक्री खुला गरेको थियो । कम्पनीले धितोपत्र बोर्डबाट जारी पुँजी १ अर्ब १७ करोड रुपैयाँको १२.५ प्रतिशतले हुन आउने ५० रुपैयाँ अंकित मूल्यका कुल २९ लाख २५ हजार कित्ता आइपीओ बिक्रीको अनुमति पाएको छ।
कुल कित्तामध्ये १० प्रतिशतले हुन आउने २ लाख ९२ हजार ५०० कित्ता कम्पनीले वैदेशिक रोजगारीमा रहेका नेपालीका लागि बिक्री खुला गरेको थियो। अब कम्पनीले सर्वसाधारणका लागि दोस्रो चरणमा आइपीओ बिक्री खुला गर्नेछ। जसअनुसार कुल कित्ताको २ प्रतिशतले हुन आउने ५८ हजार ५०० कित्ता कर्मचारीलाई र ५ प्रतिशतले हुन आउने १ लाख ४६ हजार २५० कित्ता सामूहिक लगानी कोषलाई छुट्याइएको छ। बाँकी २४ लाख २७ हजार ७५० कित्तामा सर्वसाधारणले खरिद आवेदन दिन सक्नेछन्।
