काठमाडौँ । एभरेष्ट कलर लिमिटेडको आईपीओ बाँडफाँड सम्पन्न भएको छ। सर्वसाधारणका लागि जारी गरिएको सेयर धितोपत्र बिक्री प्रबन्धक मुक्तिनाथ क्यापिटलले आज वितरण गरेको हो।
कम्पनीले जेठ २२ देखि २७ गतेसम्म ६ लाख ५५ हजार ७०० कित्ता सेयर निष्कासन गरेको थियो। उक्त आईपीओमा अपेक्षाभन्दा धेरै लगानीकर्ताको सहभागिता देखिएको छ।
क्यापिटलका अनुसार कुल २६ लाखभन्दा बढी आवेदकले करिब २ करोड ८८ लाख कित्ता सेयरका लागि आवेदन दिएका थिए। तीमध्ये २६ लाखभन्दा बढी आवेदन स्वीकृत भएका छन्।
योग्य आवेदकमध्ये ६५ हजार ५७० जनालाई प्रतिव्यक्ति १० कित्ताका दरले सेयर प्रदान गरिएको छ भने बाँकी आवेदकले सेयर पाउन सकेनन्।
माग अत्यधिक भएकाले सेयर बाँडफाँड गोलाप्रथामार्फत गरिएको हो। लगानीकर्ताले आईपीओको नतिजा मेरो सेयर तथा सिडिएस एण्ड क्लियरिङको वेबसाइटमार्फत हेर्न सक्नेछन्।
