काठमाडौं । नेपाल लेयर्स कुखुरापालक संघले फार्म समर्थन बिक्री मूल्य बढाएसँगै बजारमा अन्डाको मूल्य हालसम्मकै उच्च बिन्दुमा पुगेको छ ।
संघले शुक्रबारदेखि लागू हुने गरी सबै प्रकारका अन्डाको मूल्य प्रतिक्रेट १५ रुपैयाँले वृद्धि गरेको हो । संघका अनुसार कुखुरापालनमा लागत बढ्दै गएको र बजार मागलाई सन्तुलनमा राख्न मूल्य समायोजन गरिएको हो ।
नयाँ मूल्यअनुसार एक्सएल आकारको अन्डाको फार्म मूल्य प्रतिक्रेट ५९० रुपैयाँबाट बढेर ६०५ रुपैयाँ पुगेको छ ।
सानो अन्डाको मूल्य भने प्रतिपेटी ३ हजार २ सय रुपैयाँमै यथावत राखिएको संघले जनाएको छ । यी मूल्य फार्म मूल्य हुन् । उपभोक्ता मूल्यतर्फ अन्डाको मूल्य प्रतिगोटा २५ रुपैयाँ तोकिएको छ ।
मिडियम आकारको अन्डा दुईवटा खरिद गर्दा उपभोक्ताले ४५ रुपैयाँ तिर्नुपर्नेछ । अर्थात् प्रतिगोटा अन्डाको मूल्य साढे २२ रुपैयाँ पर्नेछ ।
संघका सचिव मदन पोखरेलका अनुसार चितवनलाई मुख्य आधार मानेर उक्त मूल्य देशभरका लागि निर्धारण गरिएको हो ।
पछिल्लो समय कुखुराको दाना, औषधि तथा ढुवानी खर्चमा निरन्तर वृद्धि हुँदा किसानहरू मर्कामा पर्दै आएको संघले जनाएको छ ।
