काठमाडौँ । शेयर बजार झिनो अकंले बढेको छ । निरन्तर सुस्त रहेको बजार आज भने सामान्य अकंले बढेको हो । नेप्से सूचक हाल २५ सयदेखि २६ सय बिन्दुको वरिपरि सीमित रहँदै उतार–चढाव भइरहेको छ।
बजारले स्पष्ट दिशा लिन नसकेकाले लगानीकर्ताको आत्मविश्वास कमजोर भएको छ।
नेपाल स्टक एक्चसेञ्ज (नेप्से) ३.२७ अंकले बढेर २५८४.४९ बिन्दुमा कायम भएको छ । आज ३२८ कम्पनीको ७६ लाख ६८ हजार ९१५ कित्ता शेयर किनबेच हुँदा ३ अर्ब ४२ करोड ९८ लाख ९३ लाख रुपैयाँको शेयर कारोबार भएको हो । आज ६ उपसूचक राताम्य भएको छ। १३४ कम्पनीको शेयर मूल्य बढेको छ भने ११७ कम्पनीको घटेको छ ।
अर्थमन्त्री रामेश्वर खनालको नेतृत्वमा पुँजी बजार सुधारका प्रयासहरू भए पनि व्यवहारमा प्रभावकारिता कम देखिएको छ। राजनीतिक अस्थिरता, सम्भावित आन्दोलनका खबर, बैंक तथा वित्तीय संस्थाका त्रैमासिक वित्तीय विवरण र बढ्दो खराब कर्जा मुख्य अस्थिरताका कारण मानिएका छन्।
ठूला लगानीकर्ता समूह र संगठित चलखेलको सम्भावनाले पनि बजारमा अनिश्चितता थपेको विश्लेषकहरूको मत छ। स्पष्ट नीति, प्रभावकारी नियमन र स्थिर राजनीतिक वातावरण नआउँदासम्म बजार सुधार सहज देखिँदैन।
