काठमाडौँ । ऊर्जा, जलस्रोत तथा सिँचाइमन्त्री दीपक खड्काले बजेटमा ‘टेक एन्ड पे’को अवधारणमा विद्युत् खरिद–बिक्री सम्झौता (पिपिए) गर्ने विषय भुलवश आएको बताए पनि अर्थमन्त्री विष्णु पौडेलले भने संसद्मा यसको बचाउ गरेका छन्।
सरकारले १५ जेठमा ल्याएको आगामी आवको बजेटमा अब टेक एन्ड पे अर्थात् चाहिएका वेला मात्रै विद्युत् किन्ने व्यवस्था समावेश छ । ऊर्जा मन्त्री दीपक खड्काले टेक एन्ड पे सच्चिने बताएका थिए तर अर्थमन्त्री विष्णु पौडेलले भने संसद्मा यसको बचाउ गरेका छन्।
सोमबार सांसदहरूले उठाएका प्रश्नलाई सम्बोधन गर्दै अर्थमन्त्री पौडेलले विचाराधीन विधेयकलाई ख्याल गरी टेक एन्ड पेको व्यवस्था ल्याएको धारणा राखेका छन् ।
अर्थमन्त्री पौडेलले भने सदनमा विचाराधीन विद्युत् विधेयक पारित भएपछि विद्युत् व्यापारको दायरा फराकिलो हुने र विद्युत् प्राधिकरणलाई मात्र विद्युत् बिक्री गर्नुपर्ने हालको अवस्था अन्त्य हुने धारणा राखेका छन् । सार्थ, अर्थमन्त्री पौडेलले यसबाट विद्युतमा निजी क्षेत्रको लगानी थप विस्तार हुने धारणा राखेका छन् ।
सरकारले विद्युत् उत्पादनमा मात्र नभई प्रसारण र बिक्रीमा समेत निजी क्षेत्रको भूमिका अभिवृद्धि गर्न चाहेको कारण यो विषयलाई चिन्ताका रूपमा नलिन अर्थमन्त्री पौडेलले आग्रह गरेका छन् । निजी क्षेत्रको लगानी निरुत्साहित गर्ने सरकारको सोच होइन। हामी प्रोत्साहित गर्न चाहन्छौँ’, उनले भने ‘टेक एन्ड पे’ प्रावधान विरुद्ध उर्जा उद्यमीहरूले गोलबन्द भएर सरकारले बेवास्ता गरे आन्दोलन नै गर्ने चेतावनी दिँदै आएका छन् ।
