काठमाडौँ । उद्योगपति तथा नेपाली काँग्रेसका सांसद विनोद कुमार चौधरीले आफू सीआईबीमा बयानका लागि उभिँदा संसारभर गलत सन्देश सम्प्रेषण भएको जनाएका छन् ।
बाँसबारी छाला जुत्ता कारखानाको सरकारी जग्गा अतिक्रमण प्रकरणमा मुछिएका चौधरीले नेपाल प्रहरीको केन्द्रीय अनुसन्धान व्युरो (सीआईबी) मा आज बिहीबार बिहान बयान दिएपछि पत्रकारहरूसँग कुरा गर्दै उनले आफू निर्दोष हुँदा हुँदै पनि सीआईबीमा बयानका लागि उभिँदा विश्वभर गलत सन्देश फैलिएको बताएका छन्।
सञ्चारकर्मीहरूसँगको कुराकानीमा चौधरीले भने , ‘म जत्तिको मान्छेले यहाँ उभिएर यो कुरा भनिरहँदा खेरि नेपालभरिका र विश्वभरिका युवाहरूले, नेपालका रोजगारदाताहरूले, करदाताहरूले कुन सन्देश आफ्नो मनमा लिएर जाने हुन् भन्ने हेक्का राज्यले राख्नुपर्ने हो ।
यस्तै उनले आफ्नो चरित्रको सर्टिफिकेट कसैलाई बुझाउनु नपर्ने बताएका छन् ।
सरकारको नाममा रहेको बाँसबारी छाला जुत्ताको १० रोपनी जग्गा विनोद चौधरीसमेत सञ्चालक रहेको च्याम्पियन फुटवेयर लिमिटेडको नाममा गैर कानुनी रूपमा ल्याएको खुलेपछि चौधरी अनुसन्धानमा तानिएका हुन् ।
