काठमाडौं। नेपाल उद्योग वाणिज्य महसंघको पहलमा तयार भएको स्टार्टअप नीति पारित भएकोमा अध्यक्ष चन्द्र ढकालले सरकारप्रति आभारी रहेको बताए ।
मंगलबार महासंघमा आयोजित कार्यक्रममा अध्यक्ष ढकालले नीति पारित भएपछि स्टार्टअप विस्तारले गति लिने बताएका छन् । दुई वर्षअघि महासंघले नीतिको मस्यौदा तयार पारी सरकारलाई बुझाएको र केही दिनअघिको मन्त्रिपरिषद् बैठकले पारित गरेको हो ढकालको भनाई छ।
‘विकसित देशमा स्टार्टअप स्थापित भएसँगै नेपालमा पनि यसको चर्चा र चासो हुनु स्वाभाविकै हो किनकि व्यवसायमा नयाँ सोच प्रार्दुभाव भइरहेको र स–सानो लगानीमा नयाँ विचारका साथ केही व्यवसाय उदाउँदै गर्दा तिनको सञ्चालन कसरी र केका आधारमा भइरहेका छन् भन्ने राज्यको चासो देखिएको छ’, उनले भने।
अध्यक्ष ढकालले भने, ‘नीति आउनु महासंघ तथा समग्र निजी क्षेत्रका लागि महत्त्वपूर्ण छ किनकि यसका लागि हामीले निरन्तर विभिन्न माध्यमबाट उद्योग, वाणिज्य तथा आपूर्ति मन्त्रालयलाई सघाउँदै आएका थियौं।’
नीतिले अंगिकार गरेका लक्ष्य, उद्देश्य, परिभाषा, रणनीति, कार्यनीति र कार्यक्रमबारे अध्यक्ष ढकाल, उद्योग, वाणिज्य तथा आपूर्ति मन्त्रालयका सहसचिव जीवलाल भुसाल सहभागी कार्यक्रममा महासंघ सचिवालयमा नीति संवाद आयोजना गरिएको हो।
