काठमाडौं । लक्ष्मी सनराइज बैंक लिमिटेडले निष्कासन गरेको ‘७ प्रतिशत लक्ष्मी सनराइज डिबेन्चर २०९२’ नेपाल स्टक एक्सचेञ्ज (नेप्से) मा सूचीकृत भएको छ।
नेप्सेका अनुसार १० वर्ष अवधिको उक्त डिबेन्चर वार्षिक ७ प्रतिशत ब्याजदरमा सूचीकृत गरिएको हो। बैंक र नेप्सेबीच डिबेन्चर सूचीकरणसम्बन्धी सम्झौता सम्पन्न भएपछि धितोपत्र सूचीकरण विनियमावली, २०७५ बमोजिम असोज १ गतेको निर्णयअनुसार ऋणपत्र सूचीकृत गरिएको हो।
बैंकले प्रतिकित्ता १ हजार रुपैयाँ अंकित मूल्यका कुल ३० लाख कित्ता डिबेन्चर सर्वसाधारणका लागि निष्कासन गरेको थियो।
नेप्सेमा ‘LSD92’ संकेतमा सूचीकृत भएको डिबेन्चरको दोस्रो बजार कारोबार असोज ८ गतेदेखि सुरु हुने नेप्सेले जनाएको छ।
लक्ष्मी सनराइज बैंकको प्रधान कार्यालय काठमाडौंको हात्तीसारमा रहेको छ। सूचीकरणपछि डिबेन्चरसँग सम्बन्धित रजिस्ट्रार तथा ट्रान्सफर सेवा लक्ष्मी सनराइज क्यापिटल लिमिटेड, नयाँ बानेश्वरबाट उपलब्ध हुने जनाइएको छ।
