काठमाडौं । भारतीय अर्बपति गौतम अडानी र उनका भतिजा सागर अडानीसँग सम्बन्धित ठगी तथा लगानीकर्तालाई भ्रममा पारेको आरोपमा अमेरिकी नियामक निकायसँग भएको सहमतिअनुसार १ करोड ८० लाख अमेरिकी डलर जरिवाना तिर्ने प्रक्रिया अघि बढेको छ।
अमेरिकी सेक्युरिटिज एन्ड एक्सचेन्ज कमिसन (SEC) ले अदालतमा दायर गरेको कागजातअनुसार गौतम अडानीले ६० लाख डलर र सागर अडानीले १ करोड २० लाख डलर तिर्ने गरी सम्झौता भएको हो। उक्त सम्झौता अदालतबाट अनुमोदनका लागि पेश गरिएको छ।
अडानी ग्रीन इनर्जीले सार्वजनिक गरेको विवरणअनुसार दुवै व्यक्तिले आरोप स्वीकार वा अस्वीकार नगरी कानुनी प्रक्रिया टुंग्याउने र तोकिएको रकम बुझाउने सहमति जनाएका छन्।
एसईसीको आरोप भारतमा भएको सौर्य ऊर्जा परियोजनासँग सम्बन्धित ठेक्का प्रक्रियामा अनियमितता र लगानीकर्तालाई गलत जानकारी दिएको विषयमा केन्द्रित छ। सोही प्रकरणसँग सम्बन्धित अन्य व्यक्तिहरू पनि अनुसन्धानको दायरामा रहेका छन्।
यसैबीच, अमेरिकी न्याय विभागले आपराधिक मुद्दा फिर्ता लिन सक्ने सम्भावना रहेको विभिन्न रिपोर्टमा उल्लेख छ। यसअघि सन् २०२४ नोभेम्बरमा न्यूयोर्क संघीय अदालतमा गौतम अडानीसहित अन्य व्यक्तिविरुद्ध घुस र ठगीसम्बन्धी अभियोग दर्ता गरिएको थियो।
अडानी समूहले भने ती सबै आरोपहरूलाई निरन्तर अस्वीकार गर्दै आएको छ र दाबीहरूलाई आधारहीन बताउँदै आएको छ।
समूह भारतको ऊर्जा, बन्दरगाह र पूर्वाधार क्षेत्रमा सक्रिय ठूलो व्यापारिक सञ्जाल हो, जसअन्तर्गत धेरै सूचीकृत कम्पनीहरू सञ्चालनमा छन्। सन् २०२३ मा हिन्डनबर्ग रिसर्चको प्रतिवेदनपछि पनि समूहमाथि वित्तीय अनियमितता र सेयर हेरफेरका आरोपहरू उठ्दै आएका छन्।
