१९ वर्ष अगाडि “समुदायका लागि, समुदायबाटै” भन्ने नारा बोकेर स्थापना भएको मुक्तिनाथ विकास बैंक आज देशव्यापी पहुँचसहित वाणिज्य बैंक बन्ने दौडमा पुगेको छ ।
हालसालै सम्पन्न साधारण सभाले यस विकास बैंकलाई वाणिज्य बैंकमा स्तरोन्नतिको लागि आवश्यक प्रकृया अगाडि बढाउन सञ्चालक समितिलाई अख्तियारी दिने प्रस्ताव समेत स्वीकृत गरेको छ ।
२०६३ साल पुस १९ गते स्याङजामा सुरु भएको एउटा सामुदायिक सपना आज राष्ट्रिय बैंकिङ यात्रामा रुपान्तरण हुँदैछ । सुरुमा स्याङजा, कास्की र तनहुँका केही सीमित क्षेत्रमै सेवा पुर्याउँदै अघि बढेको मुक्तिनाथ विकास बैंकले स्थानीय आवश्यकता, विश्वास र सहभागितालाई आफ्नो बल बनाएको अघि बढेको छ ।
एक जिल्लाबाट सुरु भएको यो बैंकिङ यात्रा क्रमशः विस्तार हुँदै आज देशका अधिकांश भू–भागमा फैलिएको छ ।
सानो कार्यालयबाट सुरु भएको सेवामा आज १४ लाखभन्दा बढी ग्राहक जोडिएका छन् । नेपाली जनताको भरोसा र विश्वासका काय यो सफल भएको बैंकको भनाई छ ।
समयसँगै प्रविधि, सेवा र संरचनामा सुधार गर्दै मुक्तिनाथ विकास बैंकले आफूलाई केवल विकास बैंकमा सीमित राखेन, वित्तीय समावेशीकरण, ग्रामीण अर्थतन्त्रको सशक्तीकरण र आधुनिक बैंकिङ सेवामा अग्रसर रहँदै यसले नयाँ उचाइ तय गर्यो ।
बैंकको अध्यक्षमा खिम प्रकाश मल्ल रहेका छन् । प्रमुख कार्यकारी अधिकृत अर्थात, सीइओमा प्रद्युमन पोखरेल रहेका छन् । उनको कार्यकालमा बैंकले थप नयाँ उचाँइ चुम्न सफल भएको छ ।
कम्पनीको वित्तीय सूचकमा पनि सुधार देखिएको छ । चालु आर्थिक वर्षको पहिलो त्रैमाससम्म बैंकको आरओई ७.५६ प्रतिशत छ । एनपीएल तुलनात्मक रुपमा अरु बैंकहरुको भन्दा कम छ । बैंकको एनपीएल ४.०३ प्रतिशत छ । ३ महिनासम्मको रिपोर्ट अनुसार बैंकको लाभांश वितरण क्षमता १७.३८ प्रतिशत छ । प्रतिशेयर नेटवर्थ १७०.०२ रुपैयाँ छ ।
अरु वित्तीय सूचक कस्ता छन् ?
चुक्ता पूँजी र जगेडा कोष
चालु आवको असोजसम्म आइपुग्दा मुक्तिनाथ विकास बैंकको चुक्ता पूँजी ७ अर्ब ४ करोड ६९ लाख रुपैयाँ रहेको छ । २०७७-७८ मा बैंकको पूँजी ४ अर्ब ८१ करोड रुपैयाँ थियो ।
गत वर्षको नाफाबाट बोनस शेयर वितरण गरेपछि बैंकको पूँजी ८ अर्ब नाघेको छ । विकास बैंकमध्ये यो सबैभन्दा धेरै हो । यद्दपि, बैंकले अब वाणिज्य बैंक बन्ने तयारी थालेको छ ।
त्यसैगरी, जगेडा कोषमा ३ अर्ब ७० करोड जम्मा रहेको छ । ३ वर्षको अन्तरमा मुक्तिनाथको जगेडा कोषको आकार बढेर १ अर्ब ११ करोडबाट बढेर ३ अर्ब ७० करोड पुगेको हो ।
खुद ब्याज आम्दानी र नाफा
बैंकले चालु आर्थिक वर्षको ३ महिनामा २२ करोड ४७ लाख नाफा कमाएको छ । गत वर्षको १२ महिनामा बैंकले १ अर्ब ३५ करोड नाफा आर्जन गरेको थियो ।
३ महिना यस बैंकले १ अर्ब १८ करोड रुपैयाँ खुद ब्याज आम्दानी गरेको छ । गत वर्ष भने बैंकले ४ अर्ब ५७ करोड ब्याज आम्दानी गरेको थियो ।
निक्षेप संकलन र कर्जा प्रवाह
मुक्तिनाथले असोजसम्म १ खर्ब १४ अर्ब रुपैयाँ बराबरको निक्षेप संकलन गरेर ९६ अर्ब ६५ करोड रुपैयाँ कर्जा विस्तार गरेको छ । रिपोर्ट अनुसार यस बैंकले आक्रामक ढंगले निक्षेप संकलन गरेर कर्जा पनि सोही अनुसार प्रवाह गरेको छ ।
प्रतिशेयर आम्दानी
मुक्तिनाथ विकास बैंकको प्रतिशेयर आम्दानी १२.७६ रुपैयाँ रहेको छ । यो चालु आर्थिक वर्षको असोजसम्मको नाफा अनुसार निकालिएको हो । गत वर्ष यस बैंकको इपीएस १९.१६ रुपैयाँ थियो ।
बैंकले गत वर्षको नाफाबाट शेयरधनीलाई १८.२ प्रतिशत लाभांश, २०७९-८० मा १०.२६ प्रतिशत, २०७८-७९ मा १४.२१ प्रतिशत र २०७७-७८ मा यस बैंकले १८.५ प्रतिशत लाभांश दिएको थियो । यो बैंकले प्रयाः दोहोरो अंकको लाभांश दिएको छ ।
बैंकले बचत तथा चालु खाता, व्यक्तिगत तथा व्यवसायिक ऋण, कृषि तथा एसएमइ कर्जा, रेमिट्यान्स सेवा, डेबिट कार्ड, मोबाइल तथा इन्टरनेट बैंकिङजस्ता आधुनिक वित्तीय सेवाहरु उपलब्ध गराउँदै आएको छ ।
डिजिटल बैंकिङ र शाखा सञ्जालको विस्तारसँगै यो बैंक आज नेपालका धेरै जिल्लामा फैलिएको छ । यसरी, यस बैंकले नेपाली बैंकिङ क्षेत्रमा आर्थिक समावेशीकरण र विकासको महत्वपूर्ण माध्यमका रुपमा स्थापित भएको हो ।
