काठमाडौं । नेकपा (एमाले) ले संसद्मा प्रधानमन्त्रीले दिएको सीमासम्बन्धी अभिव्यक्तिप्रति कडा आपत्ति जनाएको छ। पार्टीका प्रचार तथा प्रकाशन विभाग प्रमुख निरज आचार्यले सामाजिक सञ्जालमार्फत प्रधानमन्त्रीको भनाइलाई गैरजिम्मेवार र तथ्यविपरीत भएको बताएका हुन्।
आचार्यका अनुसार प्रधानमन्त्रीजस्तो उच्च जिम्मेवारीमा रहेका व्यक्तिबाट संसद्मा ‘नेपालले पनि अरू देशको भूमि मिचेको छ’ भन्ने अभिव्यक्ति आउनु दुःखद र अस्वीकार्य हो। उनले ऐतिहासिक प्रमाण, नक्सा र अध्ययनहरूले नेपालकै भूभाग अतिक्रमणमा परेको तथ्य देखाउँदा पनि यस्तो भनाइले भ्रम सिर्जना गरेको उल्लेख गरे।
उनले देशको भौगोलिक अखण्डता र सार्वभौमसत्ताको रक्षा गर्नुपर्ने नेतृत्वबाट नेपाललाई नै दोष दिने किसिमको अभिव्यक्ति आउनु राष्ट्रिय हितविपरीत भएको टिप्पणी गरे। एमालेका अनुसार यसले सीमा सुरक्षामा खटिएका सुरक्षाकर्मी, विज्ञ र आम नागरिकको भावनामा चोट पुगेको छ।
