काठमाडौँ । शेयर बजारमा आज दोहोरो अकंको बढोत्तरी आएको छ । शेयर बजारमा सुधार आए पनि कारोबार रकममा भने गिरावट आएको छ । सुरुवाती कारोबारमा नेप्से सूचकले २७ सयको मनोवैज्ञानिक रेखा पार गरे पनि अन्तिममा पुनः तल आएर बन्द भएको छ ।
आज नेपाल स्टक एक्सचेञ्ज (नेप्से) १३.९० अकंले बढेर २६८०.५२ बिन्दुमा कायम भएको छ ।
यसदिन १३ वटै उपसूचकमा हरियाली आएको छ।मसान्तको दबाब हटेसँगै वैशाखबाट बजारमा केही राहत आउने अपेक्षा गरिएको छ। हाल बैंकको साँवा–ब्याज तिर्ने चटारो, करको दायित्व र गभर्नर नियुक्तिको पर्खाइले बजारलाई थोरै दबाबमा राखे पनि समग्र रूपमा बजारमा सकारात्मक संकेत देखिन थालेका छन् ।
नयाँ गभर्नरको नियुक्त प्रक्रिया लम्बिँदै गएको र आगामी बन्ने गभर्नरले लिने नीति कस्तो हुन्छ भन्ने विषयले समेत सेयर बजारमा ठुलो प्रभाव पार्ने जानकारहरूको भनाई छ । हाल लगानीकर्ता पर्ख र हेरको स्थितिमा देखिएका छन् । यसबाहेक मुलुकको अर्थतन्त्रको आन्तरिक र बाह्य अवस्थाले पनि बजारलाई प्रभावित बनाउँछ ।
आज ३ सय १७ कम्पनीको १ करोड भन्दा बढी कित्ता सेयर कारोबार भएको छ। ४२ करोड ७५ लाख रुपैयाँभन्दा बढीसहित कारोबार रकममा एनआरएन इन्फ्रास्ट्रक्चर अग्रस्थानमा रहेको छ । यसैगरी, दोस्रो र तेस्रो स्थानमा क्रमशः सीइडीबी होल्डिङ्स र हिमालयन रिइन्सुरेन्स परेका छन्।
