काठमाडौं । बैंक तथा वित्तीय संस्थाहरूले सुनचाँदी धितो (गोल्ड लोन) शीर्षकमा झण्डै एक खर्ब रुपैयाँ बराबरको कर्जा प्रवाह गरेका छन्।
नेपाल राष्ट्र बैंकका अनुसार चालू आर्थिक वर्षको पुस मसान्तसम्ममा बैंक तथा फाइनान्स कम्पनीहरूले सुनचाँदी धितोमा ९९ अर्ब ३० करोड २० लाख रुपैयाँ कर्जा प्रवाह गरेका छन्। यो रकम गत आर्थिक वर्षको सोही अवधिको तुलनामा ३० अर्ब ६० करोड ७० लाख रुपैयाँले बढी हो।
राष्ट्र बैंकको तथ्यांकअनुसार सो अवधिसम्म बैंकिङ क्षेत्रको कुल निक्षेप ७७ खर्ब २३ अर्ब ९९ करोड ५० लाख रुपैयाँ पुगेको छ भने कुल कर्जा प्रवाह ५७ खर्ब ८१ अर्ब ४५ करोड ५० लाख रुपैयाँ रहेको छ।
चालू आवको पुस मसान्तसम्म सञ्चालनमा रहेका २० वटा वाणिज्य बैंकहरूले मात्र ६९ खर्ब ५३ अर्ब ६८ करोड ९० लाख रुपैयाँ निक्षेप संकलन गरी ५१ खर्ब ३९ अर्ब १३ करोड ५० लाख रुपैयाँ कर्जा प्रवाह गरेका छन्। यसमध्ये सुनचाँदी धितोमा मात्रै ९१ अर्ब ९४ करोड ३० लाख रुपैयाँ कर्जा प्रवाह भएको छ, जुन गत वर्षको सोही अवधिको तुलनामा २८ अर्ब ६९ करोड ६० लाख रुपैयाँले बढी हो। गत वर्ष सोही अवधिमा वाणिज्य बैंकहरूले ६३ अर्ब २४ करोड ७० लाख रुपैयाँ बराबरको गोल्ड लोन प्रवाह गरेका थिए।
त्यसैगरी, सञ्चालनमा रहेका १७ वटा विकास बैंकहरूले चालू आवको पुस मसान्तसम्म ६ खर्ब ३२ अर्ब ३९ करोड रुपैयाँ निक्षेप संकलन गरी ५ खर्ब ३६ अर्ब ९५ करोड ४० लाख रुपैयाँ कर्जा प्रवाह गरेका छन्। यसमध्ये सुनचाँदी धितोमा ६ अर्ब ५२ करोड ९० लाख रुपैयाँ कर्जा प्रवाह भएको छ, जुन गत वर्षको तुलनामा २ अर्ब १६ करोड ४० लाख रुपैयाँले बढी हो। गत वर्ष सोही अवधिमा विकास बैंकहरूले ४ अर्ब ३६ करोड ५० लाख रुपैयाँ बराबरको गोल्ड लोन दिएका थिए।
यता, सञ्चालनमा रहेका १७ वटा फाइनान्स कम्पनीहरूले चालू आवको पुस मसान्तसम्म १ खर्ब ३७ अर्ब ९१ करोड ६० लाख रुपैयाँ निक्षेप संकलन गरी १ खर्ब ५ अर्ब ३६ करोड ६० लाख रुपैयाँ कर्जा प्रवाह गरेका छन्। यसमध्ये सुनचाँदी धितोमा ८३ करोड रुपैयाँ मात्र कर्जा प्रवाह भएको छ, जुन गत वर्षको सोही अवधिको तुलनामा २१ करोड ६४ लाख रुपैयाँले कम हो। गत वर्ष सोही अवधिमा फाइनान्स कम्पनीहरूले १ अर्ब ८ करोड ३० लाख रुपैयाँ बराबरको गोल्ड लोन प्रवाह गरेका थिए।
