काठमाडौँ। शुक्रवार दिउँसो सोलुखुम्बुको थामे गाउँमा भीषण बाढी आएको छ। भोटेकोशीको सहायक खोला (थामे) मा आएको बढीले खुम्बु पासाङल्हामू गाउँपालिका वडा-५ मा पर्ने थामे गाउँ नराम्ररी प्रभावित भएको स्थानीयको भनाई छ।
अचानक आएको भीषण बाढीको कारण माथिल्लो भेगमा रहेको हितताल फुटेको हुनसक्ने स्थानीयको आकलन रहेको छ । हालसम्म ‘हिम पहिरो हो कि हिमताल फुटेको यकिन भई नसकेको प्रमुख जिल्ला अधिकारी देवी पाण्डेको भनाई छ ।
पाण्डेले आधिकारी रूपमा ठ्याक्कै यो हो भन्ने सूचना नआएको कारण सञ्चारमाध्यमले त्रसित बनाउनेतर्फ भन्दा पनि सुरक्षित र सही सूचना प्रवाह गर्दै मानवीय क्षति नहुने तर्फ सजग बनाउनुपर्नेमा ध्यान दिनु पर्ने बताएका छन् ।
हालसम्म कुनै पनि मानवीय क्षतिबारे जानकारी नआएको र निरन्तर रूपमा सम्पर्कको निमित्त प्रयास भइरहेको पाण्डेले जानकारी दिएका छन् । सामाजिक सञ्जालमा आएका भिडियोहरूमा भने बस्तीहरू नै जोखिम पर्ने गरी बाढी मच्चिएर आएको देखिएको छ ।
