काठमाडौं। नेकपा एमालेका अध्यक्ष केपी शर्मा ओलीले विश्वका धेरै देशहरू अहिले असुरक्षित र त्रासपूर्ण अवस्थाबाट गुज्रिरहेको बताएका छन्।
बिहीबार च्यासलस्थित पार्टी केन्द्रीय कार्यालयमा नवनिर्वाचित सांसदहरूलाई सम्बोधन गर्दै उनले वर्तमान विश्व परिस्थिति असामान्य बनेको उल्लेख गरे। उनका अनुसार विश्वमा भइरहेका घटनाक्रमलाई नियन्त्रण गर्न पर्याप्त र प्रभावकारी कदमहरू चालिएका छैनन्।
ओलीले विभिन्न राष्ट्रहरूको अस्तित्व नै चुनौतीमा परेको र धेरै देशहरू अस्थिर तथा भयग्रस्त वातावरणमा बाँच्न बाध्य भएको बताए।
उनले हाल भइरहेका अन्तर्राष्ट्रिय प्रयासहरू पर्याप्त प्रभावकारी नरहेको धारणा राख्दै, यस्तो अवस्थामा मानवता, न्याय, सत्य, प्रगति र शान्तिमा आधारित राजनीतिको आवश्यकता अझ बढेको बताए।
नेपालको सन्दर्भमा पनि अहिलेको राजनीतिक परिस्थिति सहज नभएको उल्लेख गर्दै उनले कठिनाइका बाबजुद अघि बढिरहेको बताए।
