सार्वजनिक पदाधिकारीमाथि निगरानी कडा, सम्पत्ति विवरणसँगै उजुरी अभियान सुरु

आयोगले बिहीबार गोरखापत्रमा सूचना प्रकाशित गर्दै सार्वजनिक पदमा रहेका व्यक्तिहरूको अस्वाभाविक सम्पत्ति आर्जनबारे उजुरी गर्न सकिने जनाएको छ।

त्यस्ता सम्पत्ति सम्बन्धित व्यक्तिको नाम मात्र नभई परिवार वा अन्य व्यक्तिको नाममा लुकाइएको भए पनि जानकारी दिन सकिने व्यवस्था गरिएको छ।

आयोगका अनुसार नेपालभित्र मात्र नभई विदेशमा रहेका शंकास्पद सम्पत्तिबारे पनि सूचना, प्रमाण वा जानकारी उपलब्ध गराउन सकिनेछ। उजुरीकर्ताले सम्भव भएसम्म कार्यालयमै उपस्थित भएर विवरण दिन सक्नेछन् भने हुलाक वा इमेलमार्फत पनि सूचना पठाउन सकिने सुविधा रहेको छ।

उजुरी दिने व्यक्तिको नाम, ठेगाना र सम्पर्क विवरण अनिवार्य भए पनि ती विवरण पूर्ण रूपमा गोप्य राखिने आयोगले स्पष्ट पारेको छ।

आयोगले हालै सार्वजनिक पदाधिकारीलाई सम्पत्ति विवरण बुझाउन निर्देशन दिएको सन्दर्भमा यो उजुरी आह्वानलाई थप कडाइका रूपमा लिइएको छ। यस दायरामा उच्च राजनीतिक पदाधिकारीदेखि स्थानीय तहका जनप्रतिनिधि र सरकारी अधिकारीहरू समेत समेटिएका छन्।