काठमाडौं। नाडा अटोमोबाइल एसोसिएसन अफ नेपालले १६औं संस्करणको नाडा अटो शो २०२४ घोषणा गरेको छ । आज बुधवार पत्रकार सम्मेलन मार्फत नाडाले भदौ ११ गतेदेखि १६ गतेसम्म काठमाडौंको भृकुटीमण्डप प्रदर्शनी स्थलमा अटो शोको आयोजना हुने लागेको जनाएको हो ।
यस वर्ष नाडा अटो शोमा टाटा ईभी मुख्य प्रायोजक र शिखर इन्स्योरेन्स कम्पनी लिमिटेड सह–प्रायोजकको रूपमा छन् । यो कार्यक्रमले अटोमोबाइल क्षेत्रको नवीनतम प्रवृत्ति र प्रविधिहरूको व्यापक प्रदर्शन गर्ने र अर्थतन्त्रलाई महत्त्वपूर्ण रूपमा वृद्धि गर्न मञ्च तयार पार्ने आयोजकले जनाएको छ ।
नाडा अटो शो २०२४ मा साना ठूला गरी १३० वटा स्टल रहने र ९५ वटा अटोमोबाइल ब्रान्ड तथा अटो कम्पोनेन्ट कम्पनीहरूको सहभागिता रहने भएको । प्रदर्शनीमा २४ चार पाङ्गे ब्रान्डहरू, १९ दई पाङ्गे बान्डहरू, १२ हल्का व्यावसायिक र सवारी साधन ब्रान्डहरू प्रदर्शन गरिनेछन्। साथै ३३ कम्पनीहरूमा लुब्रिकेन्ट, टायर, ब्याट्री, ग्यारेज उपकरण र अन्य अटो कम्पोनेन्टहरूमा विशेषज्ञ छन् र ७ वित्तीय संस्थाहरू विशेष रूपले अनुकूल वित्तीय समाधानहरू प्रदान गर्नेछन् । यसले सबै आगन्तुकहरूका लागि एक सुविधाजनक र प्रभावकारी अनुभव सुनिश्चित गर्ने आयोजकको दाबी छ ।
आगन्तुकहरूले अब खल्ती एपमार्फत अग्रिम रूपमा टिकट खरिद गर्न सक्नेछन् । सर्वसाधारणलाई २०० रुपैयाँ टिकट रहेको छ भने विद्यार्थीलाई १५० रुपैयाँ तोकिएको छ । नाडा अध्यक्ष करण चौधरीले सुस्ताएको अटो ब्यवसाय अटो सो मार्फत चलयमान हुने विश्वास ब्यक्ति गरेका छन् ।
आयोजकले यस वर्ष अटो शो मा करिब ७५ हजारको सहभागिता हुने अपेक्षा राखेको छ । सहभागि कुनै एक ब्यक्तिले जुम स्कुटर जित्ने सक्नेछन् ।
