आर्थिक भ्वाइस संबाददाता
काठमाडाैं । नेपाल राष्ट्र बैंकबाट इजाजतपत्रप्राप्त बैंक तथा वित्तीय संस्थामा प्राकृतिक व्यक्तिका नाममा खोलिएका बचत तथा मुद्दति खातामा राखेको निश्चित सीमा सम्मको रकम संस्था समस्याग्रस्त घोषणा भई फिर्ता गर्न नसकेमा उक्त सीमासम्मको निक्षेप रकम फिर्ता गर्ने गरी सुरक्षण गराउने काम नै निक्षेप सुरक्षण हो । हाल प्राकृतिक व्यक्तिका नाममा बैंक तथा वित्तीय संस्थाको बचत तथा मुद्दती खातामा रहेको ५ लाखसम्मको रकमको सुरक्षण गरिएको छ ।
नेपाल राष्ट्र बैंकबाट निक्षेप सङ्कलन गर्न इजाजत प्राप्त बैंक तथा वित्तीय संस्थाहरुको निक्षेपको सुरक्षण कोषले मात्र गर्दछ ।
सुरक्षित सदस्य संस्थाको सदस्यताको लागि बैंक तथा वित्तीय संस्थाले कोष समक्ष निवेदन दिँदा त्यस्तो संस्थाको कुल चुक्ता पूँजीको ०.०५ प्रतिशतले हुन आउने रकम सदस्यता शुल्क बापत बुझाउनु पर्नेछ ।
निक्षेप सुरक्षण शुल्क वार्षिक रुपमा ०.१६ प्रतिशत र त्रैमासिक रुपमा ०.०४ प्रतिशतको दरले निर्धारण गरिएको छ ।
सुरक्षित सदस्य संस्था समस्याग्रस्त भई लिक्विडेशन वा खारेजीको प्रक्रियामा रहेको कारणबाट सुरक्षित निक्षेपकर्ताको रकम तत्काल भुक्तानी दिन सुरक्षित सदस्य संस्था असमर्थ भएमा कोषले सम्वन्धित निक्षेपकर्तालाई सुरक्षित निक्षेपको शोधभर्ना दिन्छ ।
सम्बन्धित लिक्विडेटरले क्षतिपूर्ति दिनुपर्ने निक्षेप र निक्षेपकर्ताको विवरण कोषलाई उपलब्ध गराउनु पर्नेछ ।
निक्षेप सुरक्षण का ६१ वटा सदस्य संस्थाहरु रहेका छन् । जसमा क वर्गका वाणिज्य बैंकहरु २६ वटा, ख वर्गका विकास बैंकहरु १७ वटा, ग वर्गका फाइनान्स कम्पनीहरु १६ वटा र घ वर्गका लघुवित्त तथा वित्तीय संस्थाहरु २ वटा रहेका छन् ।
https://aarthikvoice.com/archives/10926
