काठमाडौं । आउँदो पुस २७ गते निर्माण व्यवसायीहरूले राष्ट्रिय भेला गरी सरकारलाई खबरदारी गर्ने भएका छन् । नेपाल निर्माण व्यवसायी महासङ्घका अध्यक्ष रवि सिंहले भेलामा ७७ जिल्ला र प्रदेशका प्रतिनिधिहरू रहने बताएका छन् ।
मङ्गलवार ललितपुरमा पूर्वाधार पत्रकार समाजले आयोजना गरेको कार्यक्रममा बोल्दै अध्यक्ष सिंहले यस्तो बताएका हुन ।
उनले पुस २७ गतेको राष्ट्रिय भेलामार्फत सडक आन्दोलनमा समेत जाने बताएका छन् ।
वर्तमान परिवेशमा निर्माण क्षेत्र सकसमा रहँदा पनि राज्यले निर्माण व्यवसायीहरूका समस्या समाधान नगरेकाले सडक आन्दोलनमा जान बाध्य भएको उनको भनाई छ ।
यस्तै सिमेन्ट उद्योगीहरूले उत्पादनलाई कटौती गरेर ५ सय रुपैयाँ रहेको सिमेन्टको मूल्य ७७० रुपैयाँसम्म पुराएको उनले बताए ।
सकसमा रहेको निर्माण क्षेत्र सिमेन्ट उद्योगीहरूले उत्पादनलाई कटौती गरेर मूल्यमा गरेको कालोबजारीले आफूहरू थप मारमा परेको अध्यक्ष सिंहको भनाई छ ।
