काठमाडौं । पृथ्वी राजमार्गअन्तर्गत कृष्णभिरमा गएको पहिरोका कारण ढुवानी प्रभावित हुँदा संघीय राजधानी काठमाडौंमा खाना पकाउने एलपी ग्यासको आपूर्ति उल्लेख्य रूपमा घटेको छ । मुख्य राजमार्ग अवरुद्ध भएपछि ग्यास उद्योगहरूले त्रिभुवन राजपथ हुँदै वैकल्पिक मार्गबाट ट्रकमार्फत ग्यास ल्याइरहेका छन् ।
घुमाउरो तथा असहज मार्ग प्रयोग गर्नुपर्दा बजारको मागअनुसार पर्याप्त ग्यास भित्र्याउन नसकिएको व्यवसायीहरूले बताएका छन् । ढुवानीमा आएको समस्याका कारण मंगलबार काठमाडौं उपत्यकामा ९ वटा ग्यास कम्पनीका जम्मा १८ हजार २ सय ५९ सिलिन्डर मात्रै डिलरहरूसम्म पुगेका छन् ।
एलपी ग्यास उद्योग संघका अध्यक्ष दिवान चन्दका अनुसार पछिल्ला दिनमा काठमाडौं उपत्यकामा दैनिक करिब १ लाख सिलिन्डर ग्यासको माग छ । सामान्य अवस्थामा भने उपत्यकामा दैनिक ३५ देखि ४० हजार सिलिन्डर ग्यास आवश्यक पर्ने गरेको उनले बताए ।
नेपाल आयल निगमको एलपीजी विभागका अनुसार मंगलबार सबैभन्दा धेरै सगरमाथा ग्यासले ४ हजार ६ सय ९९ सिलिन्डर बजारमा पठाएको छ । कम्पनीले ६० वटा डिलरमार्फत उक्त परिमाणको ग्यास वितरण गरेको हो ।
त्यस्तै, एभरेस्ट ग्यासले २८ वटा डिलरमार्फत ३ हजार ४ सय ७५ सिलिन्डर वितरण गरेको छ । सुगम ग्यासले १५ वटा डिलरलाई २ हजार ४ सय २३ सिलिन्डर उपलब्ध गराएको छ भने साल्ट ट्रेडिङ कर्पोरेसनको एसटीसी ग्यासले ४४ वटा डिलरमार्फत २ हजार १ सय ४६ सिलिन्डर बजारमा पठाएको छ ।
सीताश्री ग्यासले ११ वटा डिलरमार्फत १ हजार ६ सय सिलिन्डर, श्री ग्यासले १८ वटा डिलरमार्फत १ हजार ९ सय ६० सिलिन्डर र श्रीमाया ग्यासले १४ वटा डिलरमार्फत १ हजार २ सय ९१ सिलिन्डर वितरण गरेका छन् ।
यसैगरी, श्रीराम ग्यासले ९ वटा डिलरलाई ३ सय ६० सिलिन्डर र मनोज ग्यासले ६ वटा डिलरलाई ३ सय ५ सिलिन्डर मात्रै पठाएको नेपाल आयल निगमले जनाएको छ ।
ढुवानीमा भएको ढिलाइ र मागको तुलनामा आपूर्ति निकै कम भएपछि काठमाडौं उपत्यकामा ग्यास वितरण प्रणाली प्रभावित बनेको छ । ग्यास पाउने आशामा उपभोक्ताहरू डिलर तथा उद्योगमा घण्टौँसम्म लाइनमा बस्न बाध्य भएका छन् ।
मुख्य राजमार्गमा देखिएको अवरोध तत्काल हट्न नसके ग्यास आपूर्तिमा थप समस्या आउन सक्ने व्यवसायीहरूको चिन्ता छ ।
