काठमाडौं । साताको कारोबारको मध्यदिन सेयर बजारमा उत्साह देखिएको छ । बुधबार नेप्से परिसूचक दोहोरो अंकले बढ्दै २ हजार ५३८.११ विन्दुमा पुगेको छ ।
आज नेप्से परिसूचक १५.४४ अंकले बढेको हो ।
बजारमा कुल ७२ लाख ५८ हजार कित्ता सेयर २ अर्ब ९३ करोड ६५ लाख रुपैयाँ बराबरमा खरिद–बिक्री भएका छन् ।
कारोबार भएका कम्पनीमध्ये १८७ वटाको सेयर मूल्य बढेको छ भने ८१ कम्पनीको सेयर मूल्य घटेको छ । यस्तै, १० कम्पनीको सेयर मूल्य स्थिर रहेको छ ।
आज माथिल्लो मैलुङ खोला जलविद्युतको सेयर मूल्य सर्वाधिक १०.२३ प्रतिशतले बढेको छ । उपकार लघुवित्तको ८.८६ प्रतिशत, रसुवागढी हाइड्रोपावरको ५.९९ प्रतिशत, माया खोला हाइड्रोपावरको ५.९३ प्रतिशत तथा एनआईबीएल ग्रोथ फण्डको ४.२४ प्रतिशतले सेयर मूल्य बढेको छ ।
समग्र बजारमा अधिकांश कम्पनीको सेयर मूल्य बढेसँगै नेप्से परिसूचकमा समेत उल्लेख्य सुधार देखिएको हो ।
