काठमाडौँ । आज आइतबार दुई वटा संसदीय समितिको बैठक बस्दै छन्। संघीय संसद् सचिवालयका अनुसार सार्वजनिक नीति तथा प्रत्यायोजित विधायक समिति र संघीयता सबलीकरण तथा राष्ट्रिय सरोकार समितिको बैठक बस्न लागेको हो ।
त्यस्तै, प्रत्यायोजित समितिको बैठक सिंहदरबारमा बिहान साढे ११ बजे सुरु हुनेछ। उक्त बैठकमा असार २४ गते भोटेकोशी नदीमा आएको बाढी र विपद् व्यवस्थापन, मन्त्रालयसँग सम्बन्धित आर्थिक वर्ष २०८१/०८२ को नीति तथा कार्यक्रम तथा बजेट वक्तव्यमा व्यक्त सरकारी आश्वासनहरू र विविध विषयमा छलफल हुने गरी एजेन्डा तय गरिएको छ ।
साथै, यस्तै साढे ११ बजे नै बस्ने सरोकार समितिको बैठकमा वित्तीय संघीयता कार्यान्वयनको सन्दर्भमा राष्ट्रिय प्राकृतिक स्रोत तथा वित्त आयोगबाट भएका कामकारबाही, आयोगका सिफारिस र सोको कार्यान्वयनको अवस्था सम्बन्धमा छलफल हुने गरी एजेन्डा तय गरिएको छ ।
