काठमाडौँ । काठमाडौं महानगरपालिकाले आगामी आर्थिक वर्ष २०८२/८३ का लागि २५ अर्ब ७६ करोड ४३ लाखको बजेट पेश गरेको छ ।
उपमेयर सुनिता डंगोलले नगर सभामा आन्तरिक आय र बैंक मौज्दात गरी २० अर्ब १२ करोड ६४ लाख रुपैयाँको स्रोत व्यवस्थापन गरिने जानकारी गराएकी हुन्।
संघ र प्रदेश सरकारबाट ४ अर्ब ९८ करोड वित्तीय हस्तान्तरणबाट आएको थियो ।
आर्थिक विकासमा ३ प्रतिशत, सामाजिक विकासमा २० प्रतिशत, पूर्वाधार विकासमा ५१ प्रतिशत, सुशासन तथा अन्तरसम्बन्धित तर्फ १२ प्रतिशत, कार्यालय सञ्चालन तथा प्रशासनतर्फ १४ प्रतिशत बजेट विनियोजन गरिएको छ ।
चालु आर्थिक वर्षको लागि काठमाडौंले २४ अर्ब ९० करोड रुपैयाँको बजेट पारित गरेको थियो । बजेट कार्यान्वयनतर्फ असार २५ गतेसम्म १३ अर्ब ३ करोड रुपैयाँ मात्रै खर्च गरेको छ । कुल बजेटको ५२.१३ प्रतिशत मात्रै खर्च गरेको हो ।
काठमाडौं महानगरपालिकाले फोहोरमैला व्यवस्थापन, विद्यालय शिक्षा सुधार, सहरी स्वास्थ्य प्रवर्द्धन, ध्वनि प्रदूषण कम गर्ने, सार्वजनिक यातायातलाई व्यवस्थित बनाउने, महानगरभित्रका मठमन्दिर संरक्षणका लागि बजेट विनियोजन गरेको छ।
