काठमाडौं। अमेरिकी राष्ट्रपति डोनाल्ड ट्रम्पले होर्मुज जलमार्ग हुँदै आवतजावत गर्ने जहाजहरूलाई नाकाबन्दी गर्ने घोषणा गरेका छन्।
उनले सामाजिक सञ्जालमार्फत उक्त मार्ग प्रयोग गर्ने सबै जहाजहरूलाई रोकेर जाँच गरिने बताएका हुन्। विशेषगरी इरानलाई शुल्क तिर्ने जहाजहरूलाई विशेष निगरानीमा राखिने उनको भनाइ छ।
ट्रम्पका अनुसार, इरानलाई गैरकानुनी रूपमा शुल्क बुझाउने जहाजहरूलाई सुरक्षित आवागमनको सुविधा दिइने छैन।
यसअघि इरानका उपसभामुख हाजी बाबाईले सो जलमार्ग इरानको नियन्त्रणमा रहेको दाबी गर्दै त्यसलाई “रेड लाइन” का रूपमा व्याख्या गरेका थिए। उनले त्यहाँबाट गुज्रने जहाजहरूले इरानी मुद्रा रियालमा शुल्क तिर्नुपर्ने बताएका थिए।
यसैबीच, इरान र अमेरिकाबीच इस्लामाबादमा करिब २१ घण्टा लामो वार्ता भए पनि कुनै निष्कर्ष निस्कन सकेन। होर्मुज जलमार्ग सञ्चालन र आणविक कार्यक्रमका विषयमा दुबै देशबीच मतभेद कायमै रहेको बताइएको छ।
