काठमाडौँ । अमेरिकाको कोलोराडोस्थित डेनभर अन्तर्राष्ट्रिय विमानस्थलमा अवतरण गर्ने क्रममा अमेरिकी एयरलाइन्सको विमानमा आगलागी भएको छ ।
अमेरिकी सञ्चारमाध्यमका अनुसार विमानका अनुसार उक्त विमानमा १७२ जना यात्रु र चालक दलका छ जना सदस्य रहेको थिए । विमानबाट सबै यात्रुलाई सकुशल बाहिर निकालिएको भए पनि १२ जना सामान्य घाइते रहेको कारण अस्पताल भर्ना गरिएको छ ।
तथापि सामाजिक सञ्जालमा आएका श्रव्यदृष्यहरूमा भने टर्मिनल नजिकै भुईँमा जेटको वरिपरि धुवाँ उडिरहेको र आपत्कालीन सेवाहरू आइपुग्दा यात्रुहरू पखेटामा उभिएको देखिन्छ।
कोलोराडोबाट डलास–फोर्ट वर्थका लागि उडेको अमेरिकी एयरलाइन्सको उडान नम्बर १००६ लाई डेनभर अन्तर्राष्ट्रिय विमानस्थलमा डाइभर्ट गरिएको एफएएले जनाएको छ ।
एफएएले एक विज्ञप्ति जारी गर्दै भनेको छ, “अवतरण पछि र गेटमा ट्याक्सी चलाउने क्रममा एउटा इन्जिनमा आगो लाग्यो र यात्रुहरूलाई स्लाइडको प्रयोग गरेर विमानबाट बाहिर निकालिएको छ ।
अमेरिकी राष्ट्रपति डोनाल्ड ट्रम्पको प्रशासनले अमेरिकी उड्डयन एजेन्सीहरूको खर्च कटौती गर्ने प्रयास र शृङ्खलाबद्ध घटनापछि सुरक्षाको बारेमा चिन्ता व्यक्त भइरहेका बेला पछिल्लो घटना भएको हो।
