काठमाडौं । बैंकमा पैसा थुप्रिने क्रम एकाएक सुस्तिएको छ । निक्षेपसँगै कर्जा प्रवाहसमेत घटेपछि पछिल्लो समय बैंकिङ प्रणालीको गतिविधिमा संकुचन देखिएको छ । नेपाल राष्ट्र बैंकको तथ्यांकअनुसार एकै दिन बैंक तथा वित्तीय संस्थाको निक्षेप ४ अर्ब र कर्जा प्रवाह २ अर्ब रुपैयाँले घटेको छ ।
केन्द्रीय बैंकका अनुसार असोज ४ गतेसम्म बैंकिङ प्रणालीमा कुल निक्षेप ८३ खर्ब ८३ अर्ब रुपैयाँमा झरेको छ ।
वाणिज्य बैंकहरूको निक्षेपमा पनि कमी आएको छ । असोज ३ गते ७५ खर्ब ८१ अर्ब रुपैयाँ रहेको वाणिज्य बैंकहरूको कुल निक्षेप असोज ४ गते ७५ खर्ब ७६ अर्ब रुपैयाँमा सीमित भएको छ । अर्थात् एक दिनमा वाणिज्य बैंकहरूको निक्षेप ५ अर्ब रुपैयाँले घटेको छ ।
निक्षेपसँगै बैंक तथा वित्तीय संस्थाको कर्जा लगानीमा समेत सामान्य गिरावट देखिएको छ । असोज ३ गतेसम्म बैंक तथा वित्तीय संस्थाले कुल ६० खर्ब १९ अर्ब रुपैयाँ कर्जा प्रवाह गरेका थिए । असोज ४ गते यो रकम ६० खर्ब १७ अर्ब रुपैयाँमा झरेको छ ।
यस अवधिमा कर्जा प्रवाह २ अर्ब रुपैयाँले घटेको हो ।
त्यस्तै, बैंक तथा वित्तीय संस्थाको कर्जा लगानी पनि एक दिनमा २ अर्ब रुपैयाँले खुम्चिएको छ । असोज ३ गतेसम्म ५३ खर्ब ५४ अर्ब रुपैयाँ रहेको कर्जा लगानी असोज ४ गते ५३ खर्ब ५२ अर्ब रुपैयाँमा झरेको राष्ट्र बैंकको तथ्यांकमा उल्लेख छ ।
पछिल्लो तथ्यांकअनुसार बैंकहरूको औसत कर्जा–निक्षेप अनुपात (सिडी रेसियो) ७१ दशमलव १९ प्रतिशत रहेको छ ।
यस्तै, अन्तरबैंक ब्याजदर २ दशमलव ७५ प्रतिशतमा कायम रहेको छ । बैंकिङ प्रणालीमा निक्षेप र कर्जा प्रवाहमा आएको पछिल्लो परिवर्तनले वित्तीय प्रणालीमा रहेको तरलता तथा कर्जा मागको अवस्थालाई समेत संकेत गर्छ ।
