काठमाडौं । साउन महिनादेखि लागू हुनेगरी वाणिज्य बैंकहरूले मुद्दती निक्षेपको ब्याजदर घटाएका छन्, जसले निक्षेपकर्ताले पाउने प्रतिफल थप कम हुने भएको छ।
नयाँ समायोजनपछि व्यक्तिगत मुद्दती निक्षेपतर्फको औसत ब्याजदर ०.०९ प्रतिशत बिन्दुले घट्दै ४.१७ प्रतिशतमा पुगेको छ।
यसैगरी, संस्थागत मुद्दती निक्षेपमा पनि ब्याजदर घटाइएको छ। उक्त समूहको औसत दर ०.०६ प्रतिशत बिन्दुले घटेर ३.१२ प्रतिशतमा झरेको छ, जुन असारमा ३.१८ प्रतिशत थियो।
बैंकहरूको निर्णय अनुसार असार महिनामा ६ वाणिज्य बैंकले ब्याजदर घटाएका छन् भने १४ बैंकले पुरानै दर कायम राखेका छन्। दर घटाउने बैंकमा कुमारी, ग्लोबल आइएमई, सिटिजन्स, एनएमबि, स्ट्याण्डर्ड चार्टर्ड र राष्ट्रिय वाणिज्य बैंक रहेका छन्।
त्यसैगरी कृषि विकास, एभरेष्ट, नेपाल, नेपाल एसबिआई, लक्ष्मी सनराइज, प्राइम, प्रभु, माछापुच्छ्रे, हिमालयन, सिद्धार्थ, नबिल, सानिमा, नेपाल इन्भेष्टमेन्ट मेगा र एनआईसी एशिया बैंकले भने ब्याजदर यथावत् राखेका छन्।
