काठमाडौं । नेपाल राष्ट्र बैंकले प्राकृतिक विपद्बाट प्रभावित क्षेत्रमा लघुवित्त वित्तीय संस्थाको सेवा प्रवाह सहज बनाउन शाखा तथा कार्यालय स्थानान्तरण वा नजिकको शाखामा समायोजन गर्न सकिने व्यवस्था गरेको छ।
नेपाल राष्ट्र बैंकले जारी गरेको ‘लघुवित्त वित्तीय संस्थाहरूका लागि एकीकृत निर्देशन’ अनुसार २०८३ भदौमा आएको प्राकृतिक विपद्का कारण रसुवालगायत प्रभावित क्षेत्रमा शाखा तथा कार्यालयमा क्षति पुगेको वा नियमित सञ्चालनमा कठिनाइ भएको अवस्थामा सम्बन्धित इजाजतपत्रप्राप्त लघुवित्त संस्थाले राष्ट्र बैंकको पूर्वस्वीकृति नलिई शाखा स्थानान्तरण वा नजिकको अर्को शाखामा समायोजन गर्न सक्नेछन्।
विपद्का कारण भौतिक संरचनामा क्षति पुगेका, सेवा सञ्चालनमा अवरोध भएका वा सेवाग्राहीसम्म नियमित वित्तीय सेवा पुर्याउन कठिनाइ भएका शाखाहरूलाई तत्काल वैकल्पिक स्थानबाट सञ्चालन गर्न सहज बनाउने उद्देश्यले यस्तो व्यवस्था गरिएको हो।
निर्देशनअनुसार, शाखा स्थानान्तरण वा समायोजन गरेपछि सम्बन्धित संस्थाले ७ दिनभित्र नेपाल राष्ट्र बैंकलाई जानकारी गराउनुपर्नेछ।
विशेषगरी रसुवालगायत प्राकृतिक विपद्बाट प्रभावित क्षेत्रमा क्षतिग्रस्त लघुवित्त शाखाहरूलाई वैकल्पिक स्थानबाट सञ्चालन गर्न यो व्यवस्थाले सहजता प्रदान गर्ने अपेक्षा गरिएको छ। यसबाट प्रभावित सेवाग्राहीलाई ऋण, बचत तथा अन्य वित्तीय सेवा निरन्तर उपलब्ध गराउन सहयोग पुग्नेछ।
नेपाल राष्ट्र बैंकको यो व्यवस्थाले विपद्को समयमा लघुवित्त वित्तीय संस्थाको सञ्चालनलाई थप लचिलो बनाउँदै प्रभावित क्षेत्रमा वित्तीय पहुँच र सेवा निरन्तरता कायम गर्न प्राथमिकता दिएको देखिन्छ।
