काठमाडौं । नेपालको विदेशी विनिमय सञ्चिति बढेर ३९ खर्ब ४६ अर्ब रुपैयाँभन्दा माथि पुगेको छ । नेपाल राष्ट्र बैंकका अनुसार २०८३ साउन मसान्तसम्म कुल विदेशी विनिमय सञ्चिति ३९४६ अर्ब २३ करोड रुपैयाँ पुगेको हो ।
गत २०८३ असार मसान्तमा ३८९७ अर्ब ६७ करोड रुपैयाँ रहेको कुल सञ्चिति एक महिनामा १.२ प्रतिशतले बढेको हो ।
कुल सञ्चितिमध्ये नेपाल राष्ट्र बैंकमा रहेको विदेशी विनिमय सञ्चिति पनि बढेको छ । असार मसान्तमा ३४७३ अर्ब १९ करोड रुपैयाँ रहेको यस्तो सञ्चिति साउन मसान्तमा १.३ प्रतिशतले बढेर ३५१७ अर्ब ९९ करोड रुपैयाँ पुगेको छ ।
त्यस्तै, नेपाल राष्ट्र बैंकबाहेक बैंक तथा वित्तीय संस्थासँग रहेको विदेशी विनिमय सञ्चिति ०.९ प्रतिशतले बढेको छ । असार मसान्तमा ४२४ अर्ब ४८ करोड रुपैयाँ रहेको यस्तो सञ्चिति साउन मसान्तमा बढेर ४२८ अर्ब २२ करोड रुपैयाँ पुगेको छ ।
२१.८ महिनाको वस्तु आयात धान्न पर्याप्त
राष्ट्र बैंकका अनुसार २०८३ साउन मसान्तमा रहेको विदेशी विनिमय सञ्चितिले चालु आर्थिक वर्ष २०८३/८४ को पहिलो महिनाको आयातलाई आधार मान्दा २१.८ महिनाको वस्तु आयात धान्न सक्ने देखिएको छ ।
यस्तै, वस्तु तथा सेवा आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले १८.८ महिनाको आयात धान्न पर्याप्त हुने देखिएको छ ।
कुल विदेशी विनिमय सञ्चितिमा भारतीय मुद्राको हिस्सा २१.८ प्रतिशत रहेको राष्ट्र बैंकले जनाएको छ ।
जीडीपी र आयातसँगको अनुपात पनि परिवर्तन
२०८३ साउन मसान्तमा विदेशी विनिमय सञ्चितिको कुल गार्हस्थ्य उत्पादनसँगको अनुपात ५९.८ प्रतिशत पुगेको छ । त्यस्तै, कुल आयातसँगको अनुपात १५७.० प्रतिशत र विस्तृत मुद्राप्रदायसँगको अनुपात ४४.५ प्रतिशत रहेको छ ।
गत असार मसान्तमा यी अनुपात क्रमशः ५९.१ प्रतिशत, १६३.४ प्रतिशत र ४३.८ प्रतिशत रहेका थिए । यससँगै एक महिनाको अवधिमा सञ्चितिको कुल गार्हस्थ्य उत्पादन र विस्तृत मुद्राप्रदायसँगको अनुपात बढेको छ भने कुल आयातसँगको अनुपात घटेको छ ।
