काठमाडौँ । चालु आर्थिक वर्षको पहिलो ४ महिनाको अवधिमा लगानीकर्ताहरूले सरकारलाई महिना ८ अर्ब १६ करोड २६ लाख रुपैयाँ पुँजीगत लाभकर तिरेका छन् । साउनदेखि कात्तिकसम्मको अवधिमा शेयर लगानीकर्ताले उक्त रकम बुझाएका हुन् ।
यो रकम गत वर्षको सोही अवधिको तुलनामा ११ सय ६१ प्रतिशतले बढी हो। गत वर्षको पहिलो ४ महिनामा लगानीकर्ताले ६४ करोड ७० लाख रुपैयाँ पुँजीगत लाभकर तिरेको सीडीएस एन्ड क्लियरिङ लिमिटेडले जनाएको छ ।
चालु आर्थिक वर्षको पहिलो महिनामा लगानीकर्ताहरूले ४ अर्ब २३ करोड ७८ लाख रुपैयाँ भन्दा धेरैको राजश्व बुझाएक छन् । त्यसैगरी, भदौमा २ अर्ब ५७ करोड ९४ लाख, असोजमा ५८ करोड ६५ लाख, र कात्तिकमा ७५ करोड ८७ लाख रुपैयाँ क्यापिटल गेन ट्याक्स बुझाएका छन् । चालु आवको पहिलो महिना साउनमा नेप्से सूचकमा वृद्धि भएसँगै कारोबार समेत बढेकोले राजस्वमा समेत वृद्धि देखिएको छ ।
लगानीकर्ताले चालु आवको ४ महिनासम्म बुझाएको लाभकर आर्थिक वर्ष २०८०/८१ मा तिरेको रकम भन्दा धेरै हो। गत वर्ष सेयर लगानीकर्ताले ५ अर्ब ५० करोड रुपैयाँ भन्दा धेरैको कर बुझाएका थिए । सेयर बजारमा वृद्धि आएको समय लाभ कर पनि बढ्ने गरेको देखिएको छ ।
