काठमाडौँ । यस साता सत्ता समीकरण र पुन गठनको प्रभाव पुँजी बजारमा देखिएको छ। यस साता सेयर बजार तीव्र उतारचढावका बीच नेपाल स्टक एक्सचेन्ज ने(प्से) परिसूचक ७० अङ्कले बढेको छ ।
साताको पहिलो कारोबारका दिन आइतबार कारोबारपछि एक हजार नौ सय ६० को बिन्दुमा कायम भएको नेप्से परिसूचक अन्तिम दिनको कारोबार बिहीबार दुई हजार तीस दशमलव ५६ को बिन्दुमा पुगेको छ।
सोमबार मात्र नेप्से परिसूचक एक सय १७ दशमलव ७० अंकले बढेको छ ।
मङ्गलवार परिसूचक ७० दशमलव ३१ अङ्कले घटेर दुई हजार सात दशमलव ६९ को बिन्दुमा कायम भएको थियो । बुधवार र बिहीबार दुवै दिन परिसूचक बढ्यो । नेप्सेका अनुसार परिसूचक बुधवार नौ दशमलव ३३ र बिहीबार १३ दशमलव ५१ अङ्कले बढेको थियो ।
त्यसै गरी यो साता पुँजी बजारमा १३ अर्ब २२ करोड १७ लाख १७ हजार रुपैयाँ बराबरको तीन करोड ६० लाख ४४ हजार ३१ कित्ता शेयर कारोबार भएको छ । आइतबार दुई अर्ब पाँच करोड ८५ लाख ९४ हजार रुपैयाँ बराबरको ५२ लाख ३८ हजार छ सय ९६ कित्ता शेयर खरिदबिक्री भएको छ ।
नेप्से परिसूचकमा सकारात्मक सर्किट लागेको सोमबार भने ३७ करोड ३७ लाख ५१ हजार रुपैयाँ बराबरको नौ लाख २० हजार तीन सय ९९ कित्ता शेयर मात्रै किनबेच भएको छ। मङ्गलवार चार अर्ब चार करोड ५२ लाख ८२ हजार सात सय ५४ रुपैयाँ बराबरको एक करोड चार लाख दुई हजार नौ सय ४० कित्ता शेयर कारोबार भएको छ ।
त्यसै गरी, बुधवार तीन अर्ब ४२ करोड २४ लाख ८४ हजार रुपैयाँ बराबरको ८५ लाख २८ हजार दुई सय ५५ कित्ता र बिहीबार दुई अर्ब ५८ करोड ७३ लाख १६ हजार रुपैयाँ बराबरको ६३ लाख ७२ हजार चार सय ५२ कित्ता शेयर खरिद बिक्री भएको छ ।
