काठमाडौं । नेपाल राष्ट्र बैंकले बैंकिङ प्रणालीमा रहेको तरलता व्यवस्थापनका लागि १९ दिन अवधिको निक्षेप संकलन उपकरण प्रयोग गर्दै १ खर्ब रुपैयाँ तान्ने भएको छ।
यसका लागि शुक्रबार दिउँसो ३ बजे बोलकबोल प्रक्रिया सञ्चालन गरिने केन्द्रीय बैंकले जनाएको छ। सहभागी हुन इच्छुक बैंक तथा वित्तीय संस्थाहरूले न्यूनतम १० करोड रुपैयाँदेखि माथि, ५ करोड रुपैयाँको गुणकमा प्रस्ताव पेश गर्न सक्नेछन्, जुन कुल आह्वान गरिएको रकमसम्म सीमित हुनेछ।
राष्ट्र बैंकका अनुसार निक्षेप संकलन ब्याजदरको आधारमा प्रतिस्पर्धात्मक बोलकबोलमार्फत हुनेछ।
साथै, बहुब्याजदरका प्रस्तावहरू पनि पेश गर्न पाइने व्यवस्था गरिएको छ।
यस प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन योग्य हुनेछन्।
उक्त १९ दिने निक्षेप संकलन उपकरणअन्तर्गत संकलित रकमको साँवा तथा ब्याज असार १७ गते भुक्तानी गरिनेछ।
