काठमाडौं । संयुक्त राज्य अमेरिकाले चिनियाँ प्रविधि तथा अटो क्षेत्रका ठूला कम्पनीहरू अलीबाबा, बीवाईडी र बाइडुलाई चीनको सेनासँग सम्बन्धित गतिविधिमा संलग्न भएको आरोपसहित आफ्नो कालोसूचीमा समावेश गरेको छ ।
अमेरिकी रक्षा मन्त्रालय (पेन्टागन) ले सार्वजनिक गरेको नयाँ अद्यावधिक सूचीमा यी कम्पनीहरूलाई “चिनियाँ सैन्य कम्पनी” को रूपमा उल्लेख गरिएको छ । वासिङ्टनले हरेक वर्ष जारी गर्ने यस सूचीमा यसपटक कुल १८८ कम्पनी समावेश भएका छन्, जुन अघिल्लो वर्ष १३४ थियो ।
अमेरिकी पक्षका अनुसार सूचीमा परेका कम्पनीहरूले चीनको सैन्य–नागरिक एकीकरण नीतिलाई विभिन्न रूपमा सहयोग पुर्याएको दाबी गरिएको छ ।
यस निर्णयप्रति चीनले कडा आपत्ति जनाएको छ । वासिङ्टनस्थित चिनियाँ दूतावासका प्रवक्ताले यसलाई भेदभावपूर्ण र तथ्यहीन कदम भन्दै अमेरिकाले चिनियाँ कम्पनीहरूलाई अनुचित रूपमा लक्षित गरेको आरोप लगाएका छन् ।
उता अलीबाबाले आफूलाई कालोसूचीमा राख्नुको कुनै आधार नभएको बताउँदै कानुनी चुनौती दिने तयारी गरेको जनाएको छ । कम्पनीले आफू कुनै पनि सैन्य गतिविधि वा रणनीतिसँग सम्बन्धित नभएको स्पष्ट पारेको छ ।
बीवाईडी र बाइडुले भने यस विषयमा हालसम्म औपचारिक प्रतिक्रिया दिएका छैनन् ।
